Kryeministri izraelit, Benjamin Netanyahu thuhet se i premtoi ministrit të Financave, Bezalel Smotrich në takimet e fundit se, pas armëpushimit të propozuar 60-ditor me Hamasin që aktualisht është duke u diskutuar në Doha, Izraeli do të rifillonte luftën e tij kundër Hamasit në Gaza, sipas ”Channel 12”.
“Qëllimi ynë është, pas armëpushimit, të zhvendosim popullsinë e Rripit drejt jugut dhe të vendosim një rrethim në Gazën veriore”, tha Netanyahu.
Në takimet me dyer të mbyllura, Netanyahu paraqiti planin e Izraelit për të ndarë popullsinë civile të Gazës nga Hamasi dhe për t’i mbajtur ata në Rripin jugor të Gazës si një strehë humanitare, duke lejuar që konflikti të vazhdojë pas armëpushimit të përkohshëm.
Netanyahu e siguroi ministrin se do ta mbante premtimin e tij, duke përmendur planifikimin e muajit të kaluar për konfliktin me Iranin si arsyen pse pritjet e mëparshme të Smotrich për shkatërrimin e Hamasit nuk ishin përmbushur.
“Deri tani, kam qenë i angazhuar me Iranin. Tani mund të sigurohem që ushtria të ndjekë udhëzimet e mia”, tha Netanyahu.
Smotrich dhe ministri i Sigurisë Kombëtare, Itamar Ben Gvir kanë paralajmëruar se do të tërhiqen nga qeveria nëse arrihet një marrëveshje për t’i dhënë fund luftës në Gaza me Hamasin ende në pushtet.
Të dy ministrat thuhet se janë thirrur për t’u takuar me Netanyahun ditët e fundit si pjesë e përpjekjeve të vazhdueshme për të arritur një marrëveshje.
