Ekspertët paralajmërojnë se shëndeti i kockave nuk varet vetëm nga mosha, por edhe nga mënyra e ushqyerjes gjatë gjithë jetës. Sipas tyre, kalciumi, vitamina D dhe proteinat janë elementët kryesorë që ndihmojnë në ruajtjen e masës kockore dhe në uljen e rrezikut të osteoporozës dhe frakturave.
Mjekët shpjegojnë se masa kockore arrin kulmin mes moshës 25 dhe 30 vjeç, ndërsa më pas organizmi fillon gradualisht të humbasë më shumë kockë sesa krijon. Për këtë arsye, pas të tridhjetave fokusi kryesor duhet të jetë ruajtja e densitetit kockor përmes ushqimit dhe aktivitetit fizik.
Doktoresha Heidi Prather, profesoreshë e mjekësisë fizike dhe rehabilitimit, tha për “The Washington Post” se kockat e forta janë thelbësore për mbështetjen e trupit dhe parandalimin e frakturave.
Ndërsa nutricionistja Lourdes Castro i krahasoi kockat me një “llogari kursimi”, duke theksuar:
Pas moshës 30 vjeç zakonisht nuk mund t’i ndërtosh më, por mund të ruash atë që ke dhe ta mbrosh.
Sipas ekspertëve, kalciumi mbetet minerali më i rëndësishëm për kocka dhe dhëmbë të fortë, ndërsa vitamina D ndihmon organizmin ta përthithë atë. Për të rriturit nën moshën 70-vjeçare rekomandohen rreth 1,000 miligramë kalcium në ditë, ndërsa pas kësaj moshe nevojat rriten në 1,200 miligramë.
Po ashtu, proteina konsiderohet jetike, sidomos tek të moshuarit, pasi ndihmon në ruajtjen e forcës muskulore dhe ul rrezikun e rrëzimeve.
Ekspertët kanë veçuar edhe disa ushqime që ndihmojnë në forcimin e kockave:
Kosi konsiderohet një nga zgjedhjet më të mira, pasi produktet e fermentuara të qumështit lidhen me një rrezik më të ulët të frakturave. Një porcion kos grek përmban sasi të lartë kalciumi dhe proteinash, ndërsa disa variante janë të pasuruara edhe me vitaminë D.
Salmoni është një tjetër ushqim i rekomanduar, pasi furnizon organizmin me vitaminë D, proteina dhe kalcium. Ekspertët thonë se një porcion salmoni të egër mbulon më shumë se nevojën ditore për vitaminë D.
Edhe produktet e sojës, si qumështi i sojës dhe tofu, janë alternativa shumë të mira për ata që nuk konsumojnë produkte qumështi, sepse përmbajnë kalcium dhe proteina.
Mes perimeve, brokoli dhe lakra jeshile renditen ndër ushqimet më të dobishme për kockat. Përveç kalciumit, ato përmbajnë edhe vitaminë K, e cila ndihmon në forcimin e strukturës kockore dhe mund të mbrojë nga osteoporoza.
Specialistët këshillojnë që përveç dietës së pasur me lëndë ushqyese, të ruhet edhe aktiviteti fizik i rregullt, pasi kombinimi i ushqyerjes së mirë me lëvizjen është një nga mënyrat më efektive për të mbajtur kockat të forta me kalimin e viteve.
