Kufjet që bllokojnë zhurmën mund të ndihmojnë personat me ADHD të përqendrohen më mirë duke reduktuar tingujt shpërqendrues të ambientit përreth. Ekspertët sugjerojnë se ky mjet i thjeshtë mund të përmirësojë përqendrimin, sidomos në vende të zhurmshme si zyrat e përbashkëta apo ambientet publike. Shumë persona me çrregullimin e deficitit të vëmendjes dhe hiperaktivitetit (ADHD) e kanë të vështirë të përqendrohen kur rreth tyre ka zhurma ose lëvizje të vazhdueshme.
Tinguj si zilja e telefonit, bisedat e kolegëve apo edhe zhurma e aparatit të kafesë mund të bëhen shpërqendrime të mëdha. Psikologu Justin Puder shpjegon se individët me ADHD shpesh kanë vështirësi në filtrimin e tingujve të panevojshëm. Ndërsa një person pa ADHD mund të mos e vërë re fare një tingull në sfond, dikush me ADHD mund të fokusohet plotësisht tek ai tingull dhe të humbasë vëmendjen nga detyra që po bën. ADHD ndikon në mënyrën se si truri përpunon vëmendjen dhe përqendrimin. Personat me këtë gjendje mund të kenë nivele më të ulëta dopamine, një substancë kimike në tru që ndihmon në ruajtjen e fokusit. Për këtë arsye, ata mund të kenë vështirësi të qëndrojnë të përqendruar gjatë bisedave, leximit të gjatë, përfundimit të detyrave apo organizimit të kohës dhe afateve.
Psikologia Kendra Mathys shpjegon se personat me ADHD shpesh duhet të gjejnë strategji personale për t’i ndihmuar të fokusohen në punë ose në studime. Kufjet mund të jenë një nga këto strategji. Kufjet me teknologji për anulimin e zhurmës ndihmojnë duke bllokuar tingujt e zakonshëm të ambientit, si makinat që kalojnë ose zhurmat e njerëzve përreth, të cilat mund ta bëjnë një person me ADHD të humbasë lehtë përqendrimin.
Megjithatë, kufjet nuk kanë nevojë domosdoshmërisht të jenë me anulim zhurme për të qenë të dobishme. Disa persona me ADHD përqendrohen më mirë duke dëgjuar muzikë të njohur ose tinguj të qetë në sfond. Sipas ekspertëve, parashikueshmëria e tingujve është shumë e rëndësishme për shumë persona me ADHD. Një muzikë e njohur mund të jetë më pak shpërqendruese sesa tingujt e paparashikueshëm të ambientit, si hapja dhe mbyllja e derës gjatë gjithë ditës.
Disa persona mund të përfitojnë edhe nga dëgjimi i “white noise”, një zhurmë e vazhdueshme dhe e qetë që ndihmon në maskimin e tingujve të tjerë shpërqendrues. Kjo mund të krijojë një ambient më të qetë mendor dhe të ndihmojë në ruajtjen e fokusit. Ekspertët theksojnë se nuk ekziston një metodë e vetme që funksionon për të gjithë personat me ADHD. Shumë njerëz përfitojnë nga ndihma e profesionistëve të shëndetit mendor për të krijuar strategji individuale për përmirësimin e përqendrimit. Praktikat e mindfulness-it ose ndërgjegjësimit të plotë rekomandohen shpesh, sepse ndihmojnë trurin të kuptojë më shpejt momentin kur vëmendja shpërqendrohet.
Një teknikë tjetër e rekomanduar është metoda Pomodoro. Kjo metodë përfshin fokusimin në një detyrë për 25 minuta, ndjekur nga një pushim 5-minutësh. Pas katër cikleve të tilla, bëhet një pushim më i gjatë prej 15–30 minutash. Kjo e bën më të lehtë për personin të përqendrohet për periudha të shkurtra dhe të menaxhueshme, në vend që të përpiqet të fokusohet për orë të tëra. Megjithatë, disa persona me ADHD e kanë më të lehtë të vazhdojnë punën për periudha më të gjata pa ndërprerje, sepse sapo ndalojnë e kanë të vështirë të rikthehen sërish në fokus. Për këtë arsye, çdo person duhet të eksperimentojë për të kuptuar se cilat metoda funksionojnë më mirë për të.
Nëse një person është diagnostikuar zyrtarisht me ADHD, vendi i punës mund të ketë detyrimin ligjor të ofrojë kushte që e ndihmojnë të punojë më mirë, si një ambient më i qetë ose mundësia për të punuar nga shtëpia. Ekspertët theksojnë se punëdhënësit duhet të kuptojnë se njerëzit punojnë në mënyra të ndryshme dhe se pranimi i këtyre ndryshimeve ndihmon në krijimin e një ambienti pune më gjithëpërfshirës dhe produktiv.
