Shtatë parti të vogla, të cilat në zgjedhjet e fundit lokale konkuruan për rreth 200 vende këshilltarësh në 15 komuna kryesisht të vogla, si Konçe ose Debrcë, nuk fituan asnjë mandat, por megjithatë sigurojnë financim shtetëror për katër vitet e ardhshme.
Për shembull, vetëm 37 vota në Konçe u mjaftuan që sipas llogaritjeve të BIRN-it të sigurojnë një të ardhur vjetore prej rreth 80 mijë eurosh. Të gjitha 33 partitë dhe koalicionet që morën pjesë në zgjedhje arritën të kalojnë pragun ligjor prej një përqind të votave, duke fituar kështu të drejtën për financim shtetëror, informon PressOnline.al
Ministria e Drejtësisë ende po përfundon llogaritjet për shpërndarjen e parave, që këtë vit pritet të tejkalojnë rekordin prej nëntë milionë eurosh. Sipas rregullave, 70% e shumës shpërndahen sipas numrit të deputetëve dhe këshilltarëve të fituar, ndërsa 30% e mbetur ndahen në mënyrë lineare midis partive dhe koalicioneve që kanë fituar të paktën një përqind të votave.
Një shembull ilustrues është partia e re “Koncepti Maqedonas”, e cila në Debrcë fitoi 149 vota, duke kaluar pragun prej një përqind dhe duke fituar për herë të parë të drejtën për financim shtetëror. E themeluar nga ish-anëtari i VMRO-DPMNE, Petar Bogoevski, partia në zgjedhje koalicionoi me VMRO-DPMNE, përveç në komunën e vogël ku garoi me listën e saj për këshilltarë.
Paratë shtetërore janë të domosdoshme për funksionimin e partive, sidomos për partitë e vogla që nuk kanë shumë donatorë privatë dhe nuk mbledhin fonde nga anëtarësia. Pragu prej një përqind është veçanërisht lehtë të arrihet në komunat e vogla, duke bërë të mundur që partitë të marrin fonde edhe me një numër të vogël votash.
Nga ana tjetër, partitë që koalicionojnë shpesh ndajnë fondet mes vetes sipas marrëveshjes brenda koalicionit. Për shembull, në një koalicion me dhjetë parti, një shumë vjetore prej 80,000 eurosh do të ndahej mes tyre, përveç nëse do të kishte ndonjë marrëveshje tjetër të brendshme. Vetëm listat e pavarura qytetare nuk kanë të drejtë për këto fonde, pasi nuk janë regjistruar si parti politike.(PressOnline.al)
