Shtetet e Bashkuara kanë vendosur tarifa dhe kufizime të reja ndaj një sërë produktesh kanadeze, duke përfshirë pijet alkoolike, produktet e qumështit, motoçikletat dhe mallra të tjera. Masat e reja do të hyjnë në fuqi më 29 shtator dhe shënojnë një tjetër përshkallëzim të konfliktit tregtar mes dy vendeve fqinje.
Presidenti amerikan Donald Trump, përmes një serie urdhrash ekzekutivë, ka akuzuar Kanadanë se po “diskriminon” kompanitë amerikane, duke vendosur kufizime ndaj produkteve të SHBA-së, ndërsa aplikon politika më të favorshme për mallrat e vendeve të tjera.
Sipas masave të reja, disa produkte kanadeze, përfshirë hirrën dhe birrën pa alkool, do të ndalohen plotësisht nga importi në SHBA. Për produkte të tjera, mes tyre djathërat dhe varkat me motor, do të aplikohen tarifa më të larta.
Vendimi i Uashingtonit vjen pasi Kanadaja vendosi tarifa reciproke ndaj mallrave amerikane, në përgjigje të masave të administratës Trump.
Kryeministri kanadez Mark Carney deklaroi të martën se përpjekja e Kanadasë për të ulur gradualisht varësinë tregtare nga SHBA-ja, partneri i saj kryesor ekonomik, do të ketë një kosto për vendin.
Lufta tregtare mes dy vendeve ka vazhduar prej muajsh dhe ka prekur një numër të madh sektorësh të ekonomisë. Muajin e kaluar, Shtëpia e Bardhë vendosi tarifa prej 50% për rreth 20 miliardë dollarë mallra kanadeze, duke prekur sektorë si mobiliet, vera, pajisjet sportive dhe produktet e peshkimit.
Kanadaja iu përgjigj me tarifa në të njëjtën vlerë ndaj produkteve amerikane, përfshirë çelikun, veshjet dhe mobiliet. Masat kanadeze hynë në fuqi pas mesnatës të së martës.
Një nga sektorët kryesorë të prekur nga vendimet e Uashingtonit është industria kanadeze e qumështit. Sipas ekonomistit Scott French, administrata Trump e konsideron sistemin kanadez të prodhimit dhe importit të produkteve të qumështit si të padrejtë ndaj fermerëve amerikanë.
Kanadaja përdor kuota prodhimi, çmime të përcaktuara dhe kufizime për importet e qumështit, vezëve dhe shpendëve.
Ekspertët vlerësojnë se masat e reja do të rrisin presionin mbi qeverinë kanadeze, por njëkohësisht mund ta bëjnë edhe më të vështirë që Otava të pranojë kërkesat e presidentit Trump për lëshime në negociatat tregtare.
