Kryeministri Hristijan Mickoski, në një intervistë në rubrikën “Tema e ditës” në Ditarin e televizionit Sitel, theksoi se në buxhet ka fonde, se ai është stabil dhe në gjendje të shkëlqyer. Sipas tij, data 15 dhjetor nuk nënkuptonte mbylljen e thesarit, por një nismë që subjektet juridike të jenë më të përgjegjshme në dërgimin e urdhërpagesave, në mënyrë që gjithçka të mos bëhet, siç u shpreh ai, “në minutën e fundit”.
“Kur flasim për thesarin, synojmë thjesht të ketë rend. Kjo do të thotë se vitin e kaluar, në minutën e fundit, mbërritën shumë urdhërpagesa që nuk mundën të përpunoheshin; ndodhte që kreditorët të mos paguheshin me kohë dhe të kalonim në një vit tjetër fiskal. Prandaj thamë që 15 dhjetori të jetë data e fundit, që të përpiqemi të gjithë të jemi të disiplinuar. Natyrisht, edhe më 25 apo më 31 dhjetor, nëse mbërrin një urdhërpagesë, ajo do të përpunohet, por nuk mund t’i kryejmë gjithmonë punët në minutën e fundit. Le të jemi një herë të disiplinuar dhe t’i përfundojmë punët me kohë – kjo ishte nisma”, theksoi kryeministri Mickoski.
Në lidhje me akuzat e LSDM-së se mungonin 60 miliardë denarë, kryeministri Mickoski theksoi se kjo është e pavërtetë, pra buxheti është absolutisht në gjendje shumë të mirë.
“Vetëm në 10 ditët e para të këtij muaji u mblodhën 15 miliardë denarë. Të mos harrojmë se më 25 të muajit paguhet TVSH-ja e të ngjashme, por ajo që ata shohin si të dhënë në faqen e Ministrisë së Financave nuk i përfshin të ardhurat vetjake të institucioneve, sepse të gjitha kanë llogari buxhetore dhe llogari vetjake. Kur e gjithë kjo përfshihet, pra kur futet në ‘pishinë’, arrijmë te shuma prej 350–360 miliardë denarësh që duhet të mblidhen. Po ashtu, duhet ta dimë se edhe shpenzimet e ndjekin përqindërisht nivelin e të ardhurave, pra shpenzimet janë në të njëjtin përqind si të ardhurat, që do të thotë se deficiti buxhetor po zvogëlohet – kjo është diferenca mes anës së shpenzimeve dhe asaj të të ardhurave”, shpjegoi kryeministri Mickoski.
Kryeministri Mickoski i hodhi poshtë kategorikisht pretendimet se ka pasur vonesa në pagesa përtej një afati të arsyeshëm prej disa ditësh.
“Të gjitha mjetet paguhen me kohë; mund të ketë ndonjë ditë vonesë, për arsye të thjeshtë se rishpërndarja në buxhet sapo kaloi në Kuvend dhe tani duhet të nënshkruhet, të publikohet në Fletoren Zyrtare dhe ky proces të kalojë nëpër institucione, të cilat më pas t’i transferojnë mjetet te qytetarët dhe përdoruesit përfundimtarë”, tha kryeministri Mickoski.
Sa i përket deficitit buxhetor, kryeministri Mickoski sqaroi se ai financohet në tri mënyra: e para përmes letrave me vlerë shtetërore, e dyta përmes burimeve të jashtme, përkatësisht një marrëveshjeje me bankë komerciale pas një gare lokale ofertash, dhe e treta përmes euroobligacionit, duke kujtuar se qeveria e shlyeu euroobligacionin dhe nuk emetoi një të ri.
“Do t’i kujtoj qytetarët se këtë vit ne nuk emetuam euroobligacion, ndërsa shlyem një euroobligacion prej gjysmë miliardi euro më 19 janar. Ne shlyem gjysmë miliardi euro dhe nuk emetuam. Deficiti buxhetor këtë vit do të jetë nën 4% të PBB-së nominale, ndërsa PBB-ja nominale do të jetë më e lartë se ajo e projektuar në fillim të vitit. Këta janë parametra makroekonomikë që garantojnë stabilitet. Për ta përmbledhur: gjendja është stabile, por duhet të mësohemi me rend dhe disiplinë; paratë nuk mund të shpenzohen në mënyrë kaotike dhe buxheti nuk mund të shtrydhet përmes faturave të rreme dhe kërkuesve të rremë”, deklaroi kryeministri Mickoski.
