Presidenti ukrainas, Volodymyr Zelensky, i cili planifikon të dërgojë sonte në Uashington propozimin e tij të rishikuar për planin e Trump për t’i dhënë fund luftës në Ukrainë, u ndal sot në Itali si pjesë e turneut të tij në aleatët evropianë.
Zelensky u prit sot nga papa Leo XIV në rezidencën papnore të Castel Gandolfo, pranë Romës, dhe është planifikuar të takohet më vonë gjatë ditës me kryeministren italiane, Giorgia Meloni.
Meloni e ka mbështetur fuqimisht Kievin që nga fillimi i pushtimit rus në shkurt 2022, pavarësisht rezervave të Matteo Salvini, udhëheqësit të Lidhjes, një nga aleatët e saj të koalicionit.
“E kam ftuar Papën të vizitojë Ukrainën. Ky do të jetë një sinjal i fortë mbështetjeje për popullin tonë”, tha presidenti ukrainas, Volodymyr Zelensky në Telegram pas takimit me papën.
“Ukraina e vlerëson shumë të gjithë mbështetjen e papa Leo XIV dhe Selisë së Shenjtë: ndihmën e vazhdueshme humanitare dhe gatishmërinë për të zgjeruar praninë e misioneve humanitare. E informova papën për punën diplomatike me Shtetet e Bashkuara për të arritur paqen. Diskutuam përpjekjet e mëtejshme dhe ndërmjetësimin e Vatikanit për kthimin e fëmijëve tanë, të rrëmbyer nga Rusia”, theksoi ai.
Roma i ka siguruar armë Ukrainës, por vetëm për përdorim të brendshëm, dhe ka përjashtuar dërgimin e trupave, siç është propozuar nga Londra dhe Parisi.
Javën e kaluar, qeveria italiane shtyu vendimin e saj në lidhje me rinovimin e ndihmës ushtarake për Ukrainën, me autorizimin aktual që skadon më 31 dhjetor.
