Kryetari aktual i Komunës së Tetovës dhe kandidati i koalicionit VLEN për një mandat të ri katërvjeçar, Bilall Kasami, ka njoftuar sot për fillimin e ndërtimit të dy shkollave të reja në qytet – Gjimnazi “7 Marsi” dhe Shkolla e Mesme Tekstile, përcjell PressOnline.al
Kasami theksoi se pas shumë vitesh pritjeje, nxënësit e këtyre shkollave do të kenë objekte të reja, moderne dhe funksionale. “Ky projekt është më shumë sesa vetëm ndërtesa të reja. Ai është një investim i drejtpërdrejtë në arsim, dije dhe të ardhme,” u shpreh ai.
Sipas tij, objektet e reja do të ofrojnë kushte të përmirësuara për mësim, laboratorë bashkëkohorë dhe ambiente sportive, duke krijuar një mjedis që motivon dhe mbështet zhvillimin e nxënësve.
Kasami tha gjithashtu se ky hap është dëshmi se arsimi i të rinjve është prioritet për udhëheqjen e komunës.
“Çdo nxënës meriton kushte dinjitoze për të mësuar dhe për t’i realizuar ëndrrat e tij. Investimi në arsim është investimi më i mençur, sepse është investim në të ardhmen e qytetit dhe të gjithë shoqërisë sonë,” shtoi ai.
