Aktori australian Jacob Elordi është bërë kryefjalë në rrjetet sociale pasi një video e filmuar gjatë qëndrimit të tij në Japoni u përhap me shpejtësi, duke shkaktuar debate të forta mes fansave.
Në pamjet që kanë grumbulluar miliona shikime, ylli i filmave dhe serialeve të njohura shihet duke ecur në rrugë kur një fans i afrohet dhe e përshëndet me fjalët:
Çkemi, shoku?
Momenti mori një kthesë të papritur kur fansi vendosi dorën në shpinën e aktorit për të tërhequr vëmendjen e tij. Gjesti duket se nuk u prit mirë nga Elordi, i cili u kthye menjëherë dhe reagoi me tone të forta.
Të lutem mos më prek, vëlla!
-dëgjohet të thotë ai, përpara se të largohet nga vendi i ngjarjes.
Videoja u bë menjëherë virale dhe shkaktoi reagime të ndara në internet.
Shumë përdorues dolën në mbrojtje të aktorit, duke argumentuar se askush nuk ka të drejtë të prekë një person të panjohur pa pëlqimin e tij, pavarësisht nëse bëhet fjalë për një figurë publike apo jo.
Pse njerëzit mendojnë se mund të prekin të huajt?
-shkroi një komentues.
Një tjetër shtoi:
Jacob kishte plotësisht të drejtë. Vendosja e dorës mbi dikë pa leje nuk është diçka normale.
Të tjerë e cilësuan reagimin e aktorit si të kuptueshëm, duke theksuar se figurat publike përballen vazhdimisht me situata të ngjashme dhe kanë të drejtë të vendosin kufij personalë.
Megjithatë, jo të gjithë ishin dakord me mënyrën se si reagoi Elordi. Disa përdorues të rrjeteve sociale e konsideruan përgjigjen e tij të ashpër dhe jo të nevojshme.
Askush nuk po justifikon prekjen, por ai mund të kishte reaguar më qetë
-shkroi një kritik.
Të tjerë e lidhën incidentin me perceptimin e tyre se aktori shpesh shihet si i ftohtë apo arrogant në daljet publike.
Pavarësisht debateve, videoja ka hapur një diskutim më të gjerë në internet mbi kufijtë personalë, privatësinë e personazheve të famshëm dhe mënyrën se si fansat ndërveprojnë me idhujt e tyre në hapësirat publike.
