Anëtarësimi i Ukrainës në NATO nuk është aktualisht në agjendë, pasi Shtetet e Bashkuara janë të përqendruara te përpjekjet për t’i dhënë fund konfliktit në Ukrainë, deklaroi Sekretari amerikan i Shtetit, Marco Rubio.
Duke iu përgjigjur një pyetjeje nëse Ukraina duhet të bëhet anëtare e NATO-s, Rubio tha se aktualisht nuk mund të jepet një përgjigje përfundimtare.
“Për këtë pyetje nuk ka një përgjigje po ose jo”, u shpreh Rubio, duke shtuar se “anëtarësimi në NATO, siç e dini, nuk është në tryezë në këtë moment”.
Sipas tij, procesi i anëtarësimit në NATO kërkon konsensus dhe unanimitet mes vendeve anëtare, ndërsa aktualisht fokusi i Uashingtonit është te përfundimi i konfliktit në Ukrainë.
“Për momentin, kur bëhet fjalë për Ukrainën, ne thjesht përqendrohemi te përfundimi i këtij konflikti, nëse kjo është e mundur”, tha Rubio.
Sekretari amerikan i Shtetit theksoi gjithashtu se SHBA-ja dëshiron të luajë një rol konstruktiv në përpjekjet për arritjen e një zgjidhjeje.
“Ne padyshim po vëzhgojmë zhvillimet dhe po shohim se, aktualisht, ato nuk po shkojnë në drejtimin e një zgjidhjeje”, shtoi Rubio.
