Ed Sheeran ka reaguar pas polemikës së krijuar rreth largimit të Macklemore nga pjesa e mbetur e turneut të tij në SHBA, duke sqaruar se vendimi nuk ishte marrë prej tij, por nga promovuesi dhe pronarët e ambienteve ku do të zhvilloheshin koncertet.
Largimi i Macklemore nga turneu ishte vendimi i promovuesit, jo i imi
-shkroi Sheeran në një deklaratë të gjatë të publikuar në rrjetet sociale.
Sipas këngëtarit britanik, pas performancave të Macklemore në New Jersey, disa prej ambienteve ku ishin planifikuar koncertet e ardhshme i komunikuan promovuesit se nuk do ta lejonin zhvillimin e shfaqjeve nëse reperi do të ishte ende pjesë e programit. Për pasojë, promovuesi Messina Touring Group vendosi që Macklemore të mos vazhdonte me turneun.
Macklemore kishte shprehur hapur mbështetjen për Palestinën gjatë koncerteve në MetLife Stadium në New Jersey, përfshirë thirrjen “Free Palestine” dhe performancën e këngës së tij protestuese “Hind’s Hall”. Deklaratat e tij shkaktuan reagime të forta dhe një kërkesë publike për largimin e tij nga turneu.
Sheeran tha se kishte tentuar të gjente një zgjidhje gjatë gjithë javës dhe se kishte zhvilluar biseda me pronarë ambientesh, promovues dhe aktivistë nga të dyja palët. Mes personave me të cilët kishte komunikuar ishte edhe Robert Kraft, pronari i Gillette Stadium. Megjithatë, sipas Sheeran, vendimi i promovuesit dhe ambienteve ishte përfundimtar.
Kontrata e Macklemore për turneun ishte me promovuesin, jo me mua
-sqaroi ai.
Sheeran gjithashtu e bëri të qartë se nuk dëshiron që koncertet e tij të kthehen në një forum politik. Ai tha se e respekton vendosmërinë e Macklemore për të folur publikisht për atë që beson, por se vetë zgjedh ta përdorë skenën e tij për të krijuar një hapësirë ku njerëzit nga prejardhje dhe bindje të ndryshme të ndihen të mirëpritur.
Jam i tmerruar nga konflikti mes Izraelit dhe Palestinës. Vuajtja dhe dhimbja e shkaktuar në të dyja anët është një tragjedi njerëzore
-shkroi Sheeran, duke shtuar se fakti që nuk shprehet publikisht për çdo çështje politike nuk do të thotë se nuk ka pikëpamje personale apo se nuk i intereson.
Këngëtari tha gjithashtu se nuk dëshironte të zhgënjente fansat që kishin planifikuar të ndiqnin koncertet dhe as ekipin e turneut dhe artistët që varen nga këto shfaqje për të punuar.
Por situata mori një tjetër kthesë pasi disa prej artistëve që do të performonin si mbështetës të Sheeran njoftuan se po tërhiqeshin nga turneu në shenjë solidariteti me Macklemore. Mes tyre janë Finneas, Lukas Graham, Aaron Rowe dhe grupi Beoga.
Finneas e shpjegoi vendimin e tij me një mesazh të drejtpërdrejtë:
Artistët nuk duhet të ndalohen kur flasin për të shtypurit
Ndërkohë, edhe artistët e tjerë kanë shprehur mbështetjen e tyre për Macklemore dhe për të drejtën e artistëve për të folur publikisht për çështje që i konsiderojnë të rëndësishme.
Nga ana tjetër, Robert Kraft dhe Gillette Stadium kanë mbrojtur vendimin për të mos lejuar Macklemore të performojë, duke iu referuar deklaratave të tij të fundit dhe asaj që ata e përshkruajnë si histori më të gjerë të retorikës dhe imazheve antisemitike. Kraft ka theksuar gjithashtu se kundërshtimi ndaj paraqitjes së reperit nuk synon të mohojë vuajtjet e palestinezëve.
Në fund të deklaratës së tij, Sheeran tha se kishte kaluar ditët e fundit duke u përpjekur të gjente një zgjidhje.
Kam kaluar këtë javë duke u përpjekur të ndërtoj ura, të gjej një zgjidhje dhe, për fat të keq, nuk munda ta bëj këtë
-shkroi ai.
Polemika tashmë ka marrë përmasa përtej largimit të një artisti nga një turne, duke hapur debat mbi lirinë e shprehjes së muzikantëve, kufijtë e mesazheve politike në koncerte dhe rolin e promovuesve e pronarëve të ambienteve në vendimet për artistët që ngjiten në skenë.
