Zendaya dhe Tom Holland kanë bërë një rikthim që fansat e prisnin prej vitesh, duke pozuar së bashku në tapetin e kuq për herë të parë pas pesë vjetësh.
Dy yjet e Hollywood-it u shfaqën krah njëri-tjetrit në Madrid, ku kanë nisur turneun promovues të filmit të ri “Spider-Man: Brand New Day”, duke ndezur menjëherë rrjetet sociale dhe duke rikthyer vëmendjen te marrëdhënia e tyre.
Paraqitja e përbashkët vjen në një kohë kur prej javësh qarkullojnë spekulime se çifti mund të jetë martuar në fshehtësi, megjithëse asnjëri prej tyre nuk ka komentuar publikisht zërat.
Gjatë sesionit fotografik, Zendaya tërhoqi të gjitha shikimet me një fustan elegant që theksonte linjat e saj, me një çarje të lartë në këmbë dhe detaje me thekë që i shtonin edhe më shumë hijeshi paraqitjes.
Ndërkohë, Tom Holland zgjodhi një pamje klasike, por me një detaj që fansat e Spider-Man e vunë re menjëherë. Aktori u shfaq me një kostum të zi të kombinuar me një këmishë të kuqe të ndezur, një referencë e qartë ndaj personazhit që e bëri të famshëm në mbarë botën.
Dyshja u dukën të relaksuar dhe shumë të afërt gjatë gjithë eventit, duke shkëmbyer buzëqeshje dhe momente të ëmbla para kamerave.
Kjo është hera e parë që Zendaya dhe Tom pozohen së bashku në një tapet të kuq që nga promovimi i filmit “Spider-Man: No Way Home” në vitin 2021, periudhë kur konfirmuan publikisht romancën e tyre pas muajsh spekulimesh.
Megjithatë, Holland ka shpjeguar më herët pse ata rrallë zgjedhin të dalin bashkë në evente të tilla. Në një intervistë për Men’s Health, aktori tha se preferon t’ia lërë partneres së tij gjithë vëmendjen gjatë premierave.
Nuk është momenti im, është momenti i saj. Nëse shkojmë bashkë, atëherë vëmendja përqendrohet tek ne
-ishte shprehur ai.
Por këtë herë, rikthimi i tyre në tapetin e kuq rezultoi të ishte pikërisht momenti që fansat kishin pritur, duke e kthyer çiftin në një nga temat më të komentuara të ditës në rrjetet sociale.
