Hailey Bieber po e konsolidon pozicionin e saj si një nga figurat më me ndikim të modës bashkëkohore. Pas suksesit të markës së saj të bukurisë, Rhode Skin, ajo tani është bërë imazhi i fushatës më të fundit të DKNY, një nga shtëpitë më ikonike të stilit amerikan. Koleksioni i ri, “Urban Essentials Fall/Winter 2025”, prezanton një estetikë të sofistikuar, të përmbajtur dhe plot elegancë, një përkufizim i qartë i trendit “quiet glamour” që po dominon rrjetet sociale dhe pasarelat botërore.
Në setin fotografik të realizuar në New York, Hailey shfaqet me veshje që përzien elementët klasikë të street style me linja të pastra dhe tonalitete neutrale. Kostume gri me prerje të mprehta, pallto të gjata kashmiri, pantallona të gjerë dhe xhaketa të frymëzuara nga menswear krijojnë një imazh të një gruaje urbane, të sigurt dhe të qetë. “Ideja ishte të sillnim luksin e heshtur, një stil që flet për klas dhe jo për logot,” ka shpjeguar kreatorja kreative e DKNY, Emma Rae, në një intervistë për Vogue.
Hailey, e cila prej vitesh ka përfaqësuar frymën e minimalizmit modern, duket zgjedhja perfekte për këtë qasje të re të markës. Ajo është shprehur:
Për mua, eleganca nuk është të biesh në sy, por të ndihesh mirë me veten. Mendoj se kjo fushatë flet pikërisht për këtë ndjenjë.
Fotografitë janë bërë virale menjëherë, duke marrë miliona pëlqime në Instagram dhe TikTok, ku termi quiet glamour ka kaluar tashmë mbi 1.2 miliardë shikime. Ky bashkëpunim vjen në një moment të artë për Hailey. Përveç suksesit komercial të Rhode, ajo është bërë ikonë e një brezi që kërkon ekuilibrin midis bukurisë, qetësisë dhe autenticitetit. Sipas Harper’s Bazaar, ky rikthim i “glamour-it të heshtur” është një reagim i drejtpërdrejtë ndaj dekadës së fundit të estetikës së tepruar logove, ngjyrave të forta dhe konsumit të shpejtë. Hailey përfaqëson një epokë të re: luks inteligjent, ku stili është përzgjedhje, jo demostrim.
Për DKNY, bashkëpunimi me Bieber është një strategji për të rimarrë identitetin që e bëri të famshme në vitet ‘90, modë e përdorshme, por me klas. Koleksioni do të dalë në shitje në fund të tetorit dhe pritet të jetë ndër më të komentuarit e sezonit. Kritika ndërkombëtare e ka quajtur “një rikthim brilant të markës në thelbin e saj”, ndërsa Hailey po konsiderohet si “musa që i dha frymë të re ikonës së vjetër”. Në një botë ku zhurma vizuale është e pafundme, Hailey Bieber dhe DKNY na kujtojnë se ndonjëherë eleganca më e madhe është ajo që nuk ka nevojë të bërtasë.
