Ngjyra e kuqe ka qenë prej kohësh simbol i pasionit, romancës dhe dëshirës. Nga trëndafilat e kuq te buzëkuqi i ndezur dhe tapetet e kuqe të Hollywood-it, kjo ngjyrë duket se ka një ndikim të veçantë në mënyrën se si perceptojmë tërheqjen. Tani, studimet shkencore po konfirmojnë se lidhja mes së kuqes dhe atraktivitetit nuk është thjesht një ide kulturore.
Një seri kërkimesh të zhvilluara nga studiues të pesë universiteteve në vende të ndryshme të botës treguan se gratë i vlerësojnë burrat si më tërheqës kur ata shoqërohen me ngjyrën e kuqe. Në shtatë eksperimente të ndryshme, pjesëmarrëset i konsideruan më interesantë, më të dëshirueshëm dhe më të fuqishëm burrat e veshur me të kuqe krahasuar me ata që mbanin ngjyra si bluja, grija apo e bardha.
Interesant është fakti se efekti nuk kufizohej vetëm te veshja. Edhe kur fotografia e një burri kishte thjesht një kornizë ose sfond të kuq, ai perceptohej si më tërheqës. Kjo sugjeron se truri ynë krijon lidhje të forta mes ngjyrës së kuqe dhe cilësive si fuqia, vetëbesimi dhe statusi.
Nga ana tjetër, studimet kanë treguar se edhe burrat reagojnë në mënyrë të ngjashme ndaj grave që veshin të kuqe. Psikologët Andrew Elliot dhe Daniela Niesta zbuluan se burrat i perceptojnë gratë e veshura me të kuqe si më tërheqëse dhe më të dëshirueshme seksualisht sesa ato të veshura me ngjyra të tjera.
Madje, një studim zbuloi se kamarieret e veshura me të kuqe merrnin bakshishe më të larta nga klientët meshkuj krahasuar me koleget e tyre të veshura me të bardhë.
