Perrie Edwards ka bërë një rrëfim prekës për humbjet e dhimbshme që ka përjetuar në rrugëtimin e saj drejt amësisë, duke treguar për herë të parë detaje tronditëse rreth dy aborteve spontane që i lanë plagë të thella emocionale.
Ish-anëtarja e grupit Little Mix, 32 vjeçe, shpërtheu në lot gjatë një interviste në podcastin “Great Company”, ku foli hapur për sfidat që ka kaluar para se të zgjeronte familjen e saj me partnerin, futbollistin Alex Oxlade-Chamberlain.
Këngëtarja zbuloi se para lindjes së djalit të saj Axel në vitin 2021, kishte humbur shtatzëninë e parë. Ajo pranoi se në atë periudhë nuk ishte ndier plotësisht e lidhur emocionalisht me foshnjën që priste, por kjo përvojë i krijoi frikë dhe pasiguri gjatë gjithë shtatzënisë së mëvonshme.
Gjatë gjithë kohës që isha shtatzënë me Axelin kisha frikë të lidhesha emocionalisht
-rrëfeu ajo.
Megjithatë, pas lindjes së djalit, Perrie mendoi se kishte lënë pas krahëve periudhën më të vështirë. E bindur se gjithçka do të shkonte mirë, ajo mbeti sërish shtatzënë gjatë turneut të fundit të Little Mix në vitin 2022.
Por kësaj here dhimbja ishte edhe më e madhe. Në javën e 24-t të shtatzënisë, ajo humbi foshnjën që priste me partnerin e saj. Këngëtarja tregoi se çifti kishte zgjedhur tashmë emrin e bebes dhe se ishte lidhur thellësisht emocionalisht me të.
I kishim vendosur emrin. Këtë herë isha e lidhur emocionalisht dhe nuk më shkonte në mendje se diçka mund të shkonte keq. Pastaj ndodhi. Ishte traumatike
-tha ajo.
Mes emocioneve, Perrie kujtoi një nga momentet më të dhimbshme të jetës së saj.
Të duhet të lindësh një fëmijë që nuk mund ta marrësh me vete në shtëpi
-u shpreh ajo mes lotësh.
Artistja theksoi se nuk ekziston një mënyrë e lehtë për të përjetuar një abort spontan, pavarësisht se në cilën fazë të shtatzënisë ndodh humbja.
Pas tragjedisë së dytë, Perrie pranoi se iu deshën vite për të gjetur forcën për të menduar sërish për një shtatzëni tjetër.
Isha e tmerruar. Për një kohë mendova se ndoshta nuk do ta provoja më kurrë
-rrëfeu ajo.
Megjithatë, pas një beteje të gjatë emocionale, këngëtarja gjeti guximin të provonte sërish dhe në janar të vitit 2026 mirëpriti vajzën e saj, Alanis Valentine.
Sot, Perrie thotë se ndihet mirënjohëse për familjen e saj, por nuk e fsheh se rruga deri aty ishte shumë më e vështirë sesa kishte imagjinuar ndonjëherë.
