Mevlan Ademi, njëri nga organizatorët e protestave për jurisprudencën në shqip në Shkup, është shfaqur në protestën studentore në Tiranë. Fotografinë nga pjesëmarrja e ka publikuar në rrjetet sociale.
Pas protestave në Shkup, ku kërkesat e studentëve morën mbështetjen e funksionarëve të BDI-së, madje edhe për organizimin e tyre së bashku me ambasadorin shqiptar Denion Meidani, Ademi tani është shfaqur edhe mes protestuesve në kryeqytetin shqiptar. Atje, mes kërkesave është edhe dorëheqja e kryeministrit Edi Rama.
Pjesëmarrja e tij ka tërhequr vëmendjen për shkak të mbështetjes që figura të BDI-së i kanë dhënë kauzës studentore në Maqedoninë e Veriut. Në protestën e 6 prillit morën pjesë një varg funksionarësh të BDI-së, mes tyre edhe Bujar Osmani, Arbër Ademi, Arta Bilalli Zendeli, Musa Xhaferi dhe Blerim Bexheti.
Ademi ishte i pranishëm edhe në tubimin e fundit në Sllupçan, të organizuar nga BDI-ja, ku mbajti edhe fjalim.
Në rrjetet sociale po flitet me të madhe për pjesëmarrjen e tij në Tiranë. Disa komentues thonë se BDI-ja po shfrytëzon protestat studentore dhe kërkesat për largimin e Ramës, duke “dërguar” Mevlan Ademin për të sinjalizuar ndryshimin e kursit të mbështetjes ndaj kryeministrit shqiptar.
Po ashtu, mbetet të shihet nëse ambasadori shqiptar Denion Meidani, i cili e ka mbështetur publikisht Mevlan Ademin në nismat e tij, do të reagojë për pjesëmarrjen e tij në protestat e Tiranës.
