Cody Walker, vëllai i aktorit të ndjerë Paul Walker, ka bërë të qartë se nuk dëshiron të marrë sërish pjesë në përfundimin e sagës “Fast & Furious”, edhe nëse personazhi i Brian O’Conner rikthehet në filmin e ardhshëm.
Cody dhe vëllai tjetër i tij, Caleb, kishin ndihmuar në përfundimin e disa skenave të “Furious 7”, pas vdekjes së Paul Walker në një aksident automobilistik në vitin 2013.
Në një intervistë të fundit, Cody tha se nuk është i interesuar të rikthehet në të njëjtin rol në filmin e ardhshëm.
Qëndrimi im është se kjo varet nga ajo që dëshiron Meadow. Është babai i saj
-tha ai, duke iu referuar vajzës së Paul Walker, Meadow Walker.
Cody shtoi se ai personalisht nuk do të dëshironte ta përsëriste përvojën e “Furious 7”, duke theksuar se ishte i kënaqur me mënyrën se si historia e Brian O’Conner u mbyll në atë film.
Deklaratat e Cody vijnë në një kohë kur rikthimi i Brian O’Conner në filmin e fundit të “Fast & Furious” është diskutuar publikisht.
Personazhi nuk u vra në film pas vdekjes së Paul Walker, por u largua nga historia në mënyrë paqësore, duke u paraqitur si dikush që vazhdon jetën dhe kujdeset për familjen e tij.
Megjithatë, Vin Diesel ka lënë të kuptohet se dëshiron që Brian dhe Dominic Toretto të ribashkohen në filmin final të sagës. Teknologjia moderne, përfshirë inteligjencën artificiale dhe materialet e papërdorura të xhirimeve të mëparshme, mund të krijojnë mundësi për rikthimin e personazhit pa pasur nevojë për një aktor që ta interpretojë fizikisht.
Cody theksoi se, nëse një rikthim i Brian O’Conner do të realizohet, vendimi duhet të merret duke marrë parasysh dëshirën e Meadow Walker.
Ai tha se, nëse Meadow do ta dëshironte rikthimin e të atit në histori, produksioni nuk do të kishte nevojë për të ose për Caleb si zëvendësues fizikë.
Filmi i ardhshëm, i cili pritet të jetë kapitulli përfundimtar i sagës, është titulluar “Fast Forever” dhe është planifikuar të publikohet më 17 mars 2028.
