Je shtrirë në divan duke parë një film dhe mezi i mban sytë hapur. Vendos se është momenti të flesh, fik televizorin dhe shkon në dhomë. Por sapo futesh në shtrat, ndodh e kundërta: gjumi që dukej i pamundur për t’u luftuar vetëm pak minuta më parë, papritur është zhdukur.
Është një situatë që mund t’u ndodhë shumë njerëzve dhe pas saj nuk fshihet vetëm një shpjegim. Ambienti, rutina, ekspozimi ndaj dritës dhe madje mendimet që fillojnë sapo vendosim kokën në jastëk mund të luajnë rol.
Trupi ishte gati për gjumë, por ti ndryshove aktivitet
Kur je i shtrirë rehat në divan, në një ambient të qetë dhe me pak lëvizje, mund të fillosh natyrshëm të përgjumesh. Por momenti kur ngrihesh për të shkuar në shtrat përfshin një seri veprimesh: ecën nëpër shtëpi, lan dhëmbët, ndërron rrobat, ndez dritat, kontrollon telefonin apo përgatit dhomën. Edhe pse duken si veprime të vogla, ato mund të të bëjnë përkohësisht më vigjilent.
Telefoni mund ta komplikojë situatën
Një nga zakonet më të zakonshme është kontrollimi i telefonit pikërisht përpara gjumit. Hap një mesazh, më pas Instagramin, pastaj TikTok-un dhe ajo që supozohej të ishte vetëm një minutë mund të zgjasë shumë më tepër. Përveç stimulimit që sjell vetë përmbajtja, ekspozimi ndaj dritës në mbrëmje mund të ndikojë te ritmi cirkadian dhe proceset që e përgatisin organizmin për gjumë. Kështu, ndërsa pak minuta më parë mezi qëndroje zgjuar para televizorit, telefoni mund t’i japë trurit arsye të vazhdojë të jetë aktiv.
Sapo vendos kokën në jastëk, fillon të mendosh
Gjatë ditës jemi të rrethuar nga stimuj: punë, njerëz, telefona, muzikë, trafik dhe biseda. Pastaj vjen momenti kur fikim gjithçka. Dhe mendja duket sikur vendos të hapë të gjitha temat njëherësh. Një bisedë që ke bërë gjatë ditës. Diçka që duhet të bësh nesër. Një situatë e sikletshme nga pesë vite më parë. Një email që harrove të dërgoje. Kur përpiqemi me forcë të flemë, mund të bëhemi edhe më të vetëdijshëm për faktin se gjumi nuk po vjen. Dhe pikërisht ky shqetësim mund ta bëjë relaksimin më të vështirë.
Divani dhe shtrati mund të krijojnë ndjesi të ndryshme
Në divan nuk po përpiqesh domosdoshmërisht të flesh. Thjesht po shikon diçka dhe gjumi vjen vetë. Në shtrat, qëllimi ndryshon: “Tani duhet të fle”. Për disa njerëz, sidomos kur kanë kaluar disa net duke u përpjekur të flenë, shtrati mund të fillojë të lidhet me pritjen, frustrimin apo kontrollimin e orës. Kjo është edhe arsyeja pse rekomandimet për një gjumë më të mirë shpesh theksojnë rëndësinë e krijimit të një rutine të qëndrueshme dhe të përdorimit të shtratit kryesisht për gjumë.
Ndonjëherë ke humbur thjesht momentin e përgjumjes
Përgjumja nuk qëndron gjithmonë në të njëjtin nivel gjatë gjithë mbrëmjes. Mund të kalosh nga një moment kur sytë të mbyllen vetë në një periudhë kur ndihesh përsëri më i zgjuar.
Nëse në atë interval ngrihesh, ndez dritat dhe fillon të merresh me gjëra të tjera, ndjesia e fortë e gjumit mund të zbehet përkohësisht.
Prandaj, kur e kupton se po të zë gjumi në divan, mund të jetë më mirë të mos e shtysh shumë momentin për të shkuar në shtrat.
Dhe ndoshta rregulli më i rëndësishëm është të mos e kthesh gjumin në një detyrë që duhet realizuar me çdo kusht. Sa më shumë të mendosh “duhet të fle tani”, aq më frustrues mund të bëhet fakti që je ende zgjuar.
Kështu që herën tjetër kur filmi të duket si ilaçi perfekt për gjumë, por shtrati të zgjojë menjëherë, mos u habit. Ndonjëherë problemi nuk është se gjumi u zhduk në mënyrë misterioze, por gjithçka që ndodhi gjatë rrugës nga divani deri te jastëku.
