Një 48-vjeçar britanik është bërë pacienti i parë në botë që i është nënshtruar heqjes së një tumori në tru me ndihmën e Inteligjencës Artificiale. Rhys Hibbert u operua në National Hospital for Neurology and Neurosurgery në Londër, ku teknologjia e avancuar u përdor për t’u ndihmuar kirurgëve gjatë ndërhyrjes.
Gjatë operacionit, sistemi i Inteligjencës Artificiale identifikoi dhe shënoi me ngjyra struktura shumë të vogla të trurit, duke u mundësuar mjekëve të dallonin më lehtë zonat kritike dhe t’i shmangnin ato. Sipas mjekëve, në kirurgjinë e trurit edhe një devijim prej vetëm një milimetri mund të shkaktojë pasoja serioze, veçanërisht kur preken nervat që lidhen me shikimin.
Hibbert ka deklaruar se ndërhyrja i ndihmoi të ruante shikimin dhe se tashmë është rikthyer në punë pas operacionit. Teknologjia është zhvilluar në Britani nga studiuesit e UCL Hawkes Institute dhe është trajnuar duke përdorur qindra video nga operacione të trurit.
Ekspertët e konsiderojnë këtë zhvillim një hap të rëndësishëm në përdorimin e Inteligjencës Artificiale në kirurgji. Teknologji të ngjashme mund të përdoren në të ardhmen edhe për diagnostikimin më të hershëm të sëmundjeve dhe për lehtësimin e ngarkesës mbi sistemet shëndetësore. Ky rast shihet si një tjetër dëshmi e rolit gjithnjë e më të madh që AI mund të ketë në mjekësinë moderne, veçanërisht në ndërhyrjet ku saktësia është vendimtare.
