Autoritetet në Japoni janë vënë në kërkim të një ariu që është përshkruar si “jashtëzakonisht inteligjent”, pasi ka plagosur katër persona në pjesën veriore të vendit dhe më pas ka arritur të arratiset nga një ndërtesë ku ishte strehuar.
Sipas mediave japoneze, ariu kishte sulmuar më herët dy fabrika në prefekturën Fukushima, duke plagosur katër persona, përpara se të fshihej në një ndërtesë. Një ditë më pas, ai arriti të largohej gjatë natës, duke shmangur edhe gjuetarët e pajisur me kurthe dhe armë qetësuese.
Autoritetet lokale bëjnë të ditur se nga vendngjarja janë gjetur shenja që sugjerojnë se ariu mund të ketë hapur vetë një dritare për të dalë, ndërsa dyshohet gjithashtu se ka hapur një rubinet uji për të pirë.
Kryetari i bashkisë së Fukushimës, Yuki Baba, është shprehur se kafsha tregon sjellje të pazakonta dhe është përshkruar si “shumë inteligjente”, ndërsa kërkimet për kapjen e saj vijojnë me pjesëmarrjen e gjuetarëve, policisë dhe zjarrfikësve.
Në Japoni është raportuar rritje e rasteve të shfaqjes dhe sulmeve nga arinjtë vitet e fundit, duke rritur shqetësimin e autoriteteve dhe banorëve lokalë.
/vizionplus.tv
