Jennifer Garner ka folur hapur për periudhën e vështirë që pasoi ndarjen nga ish-bashkëshorti i saj, Ben Affleck, duke e përshkruar atë si një “tronditje familjare” që e detyroi të përqendrohej pothuajse tërësisht te fëmijët e tyre.
Në një intervistë për revistën InStyle, aktorja 54-vjeçare tregoi se për shumë vite reduktoi ndjeshëm angazhimet profesionale për t’u kujdesur për tre fëmijët e çiftit: Violet, Finn dhe Samuel.
Kur fëmijët e mi ishin të vegjël, punova shumë pak. Më pas familja jonë kaloi një periudhë të vështirë dhe për një kohë të gjatë pothuajse nuk punova fare
-u shpreh Garner.
Ndërsa Affleck vazhdonte karrierën e tij me filma të suksesshëm si “Batman v Superman: Dawn of Justice” dhe “The Accountant”, Garner ishte ajo që merrej kryesisht me përditshmërinë e fëmijëve, nga dërgimi dhe marrja në shkollë deri te organizimi i jetës familjare.
Sot, me fëmijët tashmë më të rritur, aktorja thotë se ka rifituar një pjesë të rëndësishme të jetës së saj profesionale dhe po e shijon rikthimin në aktrim.
Jam shumë mirënjohëse që e kam sërish këtë pjesë të jetës sime. Kam pasur një vit e gjysmë ku i jam përkushtuar plotësisht aktrimit dhe kjo ka qenë një dhuratë për mua
-tha ajo.
Garner do të rikthehet së shpejti në ekran me serialin e ri “The Five-Star Weekend”, ku luan përkrah aktoreve si Chloë Sevigny, Gemma Chan dhe Judy Greer.
Aktorja theksoi gjithashtu se nuk ndjen nevojën t’u kërkojë falje fëmijëve kur punon, pasi beson se puna dhe përkushtimi janë pjesë e rëndësishme e jetës.
Puna e palodhur është pjesë e jetës. Edhe gabimet janë pjesë e saj. Nuk ekziston përsosmëria
-tha ajo.
Në fund, Garner dha një mesazh për të gjitha nënat që përpiqen të balancojnë familjen dhe karrierën, duke theksuar se nuk ekziston një formulë perfekte.
Nuk ka ekuilibër të përkryer. Nuk ka mënyrë ideale për t’i bërë të gjitha siç duhet. Duhet të jesh e sjellshme me veten dhe të pranosh se jeta do të jetë gjithmonë paksa e papërsosur
-përfundoi aktorja.
