Vitin e kaluar, Shqipëria prezantoi atë që e quajti ministren e parë në botë të inteligjencës artificiale. Megjithatë, rezultoi se ajo nuk ishte plotësisht artificiale.
Sipas AssociatedPress, aktorja shqiptare Anila Bisha thotë se fytyra dhe zëri i saj i përkasin asaj dhe nuk e kishte imagjinuar kurrë që qeveria do t’i përdorte kaq dukshëm imazhin e saj.
Tani Bisha, një aktore e njohur e filmit dhe teatrit në Shqipëri, kërkon që tiparet e saj të hiqen nga ajo që quhet ministrja virtuale, Diella.
Duke iu referuar shkeljes së të dhënave personale, Bisha ka dorëzuar këtë javë një kërkesë zyrtare përmes një gjykate administrative në Shqipëri, duke kërkuar që qeveria të ndalojë menjëherë përdorimin e zërit dhe imazhit të saj për Diellën.
Qeveria ka reaguar pas kallëzimit që aktorja Anila Bisha ka depozituar në Gjykatën Administrative të Tiranës, ku kërkon pezullimin e ministres së Shtetit për Inteligjencën Artificiale, Diella.
Ka qenë drejtoresha e Agjencisë për Median dhe Informimin, Manjola Hasa, e cila ka bërë të ditur qëndrimin e palës tjetër në këtë proces. Hasa është shprehur se qeveria e sheh këtë si një të drejtë ligjore të ushtruar nga Bisha, por e konsiderojnë pretendimin e ngritur nga ajo si të pabazë.
Ajo theksoi se Shqipëria është një vend i lirë dhe demokratik, ku qytetarët kanë të drejtë të ndjekin rrugët ligjore kundër qeverisë, ndërsa vlerësimi përfundimtar i takon gjykatës.
Shqipëria tërhoqi vëmendjen globale vitin e kaluar kur Kryeministri Edi Rama njoftoi krijimin e asaj që e përshkroi si ministren e parë në botë të inteligjencës artificiale, e cila kishte si qëllim që të gjitha tenderët e prokurimeve publike të trajtoheshin 100 për qind pa korrupsion. Diella zakonisht shfaqet e veshur me kostum kombëtar shqiptar dhe njihet për përgjigjet e saj të shkurtra dhe të drejtpërdrejta ndaj zyrtarëve të qeverisë.
Por, Bisha pranoi se kishte nënshkruar një kontratë duke lejuar përdorimin e zërit dhe imazhit të saj për platformën online të qeverisë, e-Albania, e cila ofron një gamë të gjerë shërbimesh publike. Por ajo tha se kurrë nuk ishte informuar se do të përdorej për një ministre të inteligjencës artificiale.
“Ishte e habitshme kur dëgjova kryeministrin ta deklaronte këtë. Pyeta si mund të ndodhte kjo pa dijeninë time, pa pyetur askush nëse doja që imazhi im të përdorej ose jo”, tha Bisha për AP të enjten. Ajo tha se ndihet se imazhi i saj tani po përdoret si një deklaratë politike.
Në vitin 2024, OpenAI hoqi një nga zërat e ChatGPT, Sky, pasi aktorja Scarlett Johansson tha se tingëllonte “frikësisht i ngjashëm” me të sajin. OpenAI tha se zëri i përdorur për Sky nuk ishte ai i Johansson.




