Kuvendi i Kosovës do të mblidhet sërish sot në përpjekjen e 33-të për t’u konstituuar, pas zgjedhjeve parlamentare të 9 shkurtit. Deri më tani, përpjekjet për zgjedhjen e Kryetares së Kuvendit kanë dështuar për shkak të mungesës së votave dhe mosmarrëveshjeve ndërmjet partive politike.
Në seancën e fundit, nuk u miratua propozimi për krijimin e Komisionit Zgjedhor – një hap i domosdoshëm për mbajtjen e votimit të fshehtë. Kryesuesi Avni Dehari kishte kërkuar nga subjektet politike të propozonin anëtarët e tyre për këtë komision, por propozimi nuk kaloi.
Kandidatja e Vetëvendosjes për kryetare të Kuvendit, Albulena Haxhiu, vazhdon të mos marrë përkrahjen e nevojshme nga partitë opozitare, të cilat kanë deklaruar se nuk do ta mbështesin. LVV, nga ana tjetër, ka bërë të qartë se nuk do ta ndryshojë kandidaturën.
