Objektin për sigurinë e të cilit do kujdeset tash e tutje e ka vendpune të përkohshëm.
Punonjësit e sigurimit fizik nëpër Qendrat e Mjekësive Familjare janë transferuar nga ndërtesat komunale, meqë kontrata me operatorin privat ka skaduar.
Madje që s’do të punojnë më u njoftuan në ditën e fundit.
Kështu tha punonjësi Adem Borovci përmes telefonit.
“Neve na ka njoftu kompania atë ditë kur ka përfundu, ka thënë kontrata ka përfundu dhe sa i përket kompanisë jeni të lirë. Na prej 2011 jena të privatizum dhe s’ka ndodh kurrë që punëtorët me mbet në rrugë”, ka thënë Adem Borovci, punëtorë i sigurimit fizik.
Kryetari i Sindikatës së Punëtorëve të Sektorit privat, Jusuf Azemi pati një paralajmërim për institucionet.
“Ne javën e ardhshme sepse tek e fundit nuk është problemi ynë a kanë buxhet a nuk kanë do të fillojmë me protesta dhe greva para komunës së Prishtinës dhe jo në vendet e punës dhe paramendoni këto qendra tash janë pa sigurim fiizk”, ka thënë Jusuf Azemi, kryetar i Sindikatës së Punëtorëve.
Azemi tregoi numrin e punëtorëve që po largohen nga sektori privat.
“Kemi shqetësime të mëdha sepse kemi punëtorë që kanë punu aty që 20 vjet dhe për një moment të mos i vazhdohet kontrata dhe në një moment t’i thuhet vazhdo në shtëpi është shumë e rëndë këto janë një pjesë ose të themi më mirë që për këtë rreth 4000 mijë punëtorë ikun nga Kosova”, ka thënë Jusuf Azemi, kryetar i Sindikatës së Punëtorëve.
Komuna e Prishtinës ka arsyetuar këtë me procedurat për kontratë të re.
“Kontrata për sigurimin fizik të objekteve të Qendrave të Mjekësisë Familjare ka përfunduar në muajin shtator. Për rrjedhojë, vazhdimi i angazhimit të punonjësve të sigurimit që kanë shërbyer në këto lokacione mbetet në pritje të përfundimit të procedurave të tenderimit dhe lidhjes së kontratës së re.” – DREJTORIA PËR SIGURI DHE EMERGJENCA
Siç merr vesh televizioni Dukagjini, thirrja për operatorët privat për sigurim fizik nuk është hapur ende për shkak të mungesës së fondeve nga Komuna e Prishtinës.
