Spanja do të përballet me Republikën Çeke në një sfidë të Grupit A3 të Ligës së Kombeve, me objektivin për të vijuar serinë mbresëlënëse pa humbje dhe për të ruajtur pozitat në krye të grupit.
Kampionët e Europës vijnë në këtë përballje në një formë mjaft pozitive, pasi kanë regjistruar fitore ndaj Anglisë dhe Kroacisë në dy ndeshjet e para. Këto rezultate e kanë çuar Spanjën në kuotën e 40 ndeshjeve radhazi pa humbje brenda 90 minutave, me një bilanc prej 30 fitoresh dhe 10 barazimesh.
Dominimi i iberikëve konfirmohet edhe në Ligën e Kombeve, ku nuk kanë pësuar humbje në kohën e rregullt që prej shtatorit të vitit 2022, kur u mposhtën 1-2 nga Zvicra.
Kjo mbetet gjithashtu disfata e vetme e Spanjës në shtëpi që prej tetorit të vitit 2018.
Përballja me Çekinë do të zhvillohet në Oviedo, një qytet ku përfaqësuesja spanjolle rikthehet pas 11 vitesh.
Në shtatë ndeshjet e mëparshme ndërkombëtare të zhvilluara në këtë stadium, Spanja ka arritur pesë fitore, një barazim dhe vetëm një humbje.
Me një ecuri të tillë dhe me synimin për të konfirmuar formën e saj, Spanja do të kërkojë një tjetër rezultat pozitiv, ndërsa Republika Çeke do të tentojë të ndërpresë serinë e suksesshme të iberikëve.
