Nicole Kidman ka ndarë një detaj personal nga fëmijëria e saj, duke treguar se ka përjetuar belbëzim në moshë të vogël dhe se kjo përvojë ka ndikuar në mënyrën se si ajo komunikon edhe sot.
Aktorja 59-vjeçare e tregoi këtë gjatë një interviste të përbashkët me Sandra Bullock, me të cilën luan në filmin e ri “Practical Magic 2”.
Bullock u shpreh e befasuar kur mësoi për vështirësinë që Kidman kishte përjetuar si fëmijë dhe e pyeti se në çfarë moshe kishte ndodhur.
Kidman tregoi se belbëzimi e kishte shoqëruar rreth moshës katër deri në gjashtë vjeç. Ajo kujtoi se shpesh e dinte saktësisht se çfarë dëshironte të thoshte dhe mezi priste ta shprehte, por i duhej kohë që fjalët të dilnin.
Edhe pse problemi është kapërcyer në masë të madhe, Kidman pranoi se herë pas here ende mund të përjetojë momente të tilla. Me kalimin e viteve, ajo ka mësuar një teknikë që e ndihmon ta menaxhojë situatën.
Aktorja shpjegoi se, kur ndien se po ngec gjatë të folurit, ngadalëson ritmin dhe bën një pauzë të shkurtër. Këshilla që merrte si fëmijë, të ndalonte, të mendonte dhe më pas të fliste, është kthyer në një mënyrë që ajo e përdor edhe sot.
Kidman e lidhi këtë përvojë të fëmijërisë edhe me natyrën e saj të ndrojtur. Ajo ka rrëfyer se, pavarësisht karrierës së gjatë në Hollywood, ende mund ta ndiejë atë pasiguri në situata të caktuara shoqërore, si të hyjë e vetme në një restorant të mbushur ose të mbërrijë në një festë.
Rrëfimi i saj vjen në një moment kur aktorja po promovon “Practical Magic 2”, vazhdimin e filmit të vitit 1998, ku rikthehet në ekran përkrah Sandra Bullock.
