David dhe Victoria Beckham kanë treguar edhe një herë mbështetjen e tyre për djalin Cruz, duke ndërprerë pushimet e tyre në Bregun e Amalfit për të qenë pranë tij në një prej momenteve më të rëndësishme të karrierës së tij muzikore.
Çifti udhëtoi drejt “Reading Festival”, ku 21-vjeçari bëri debutimin e tij në këtë festival me grupin muzikor “The Breakers”.
Edhe pse moti nuk ishte aspak në favor të tyre dhe shiu i rrëmbyeshëm shoqëroi festivalin, David dhe Victoria e ndoqën performancën nga prapaskena.
Në një prej momenteve të kapura nga fotografët, Victoria shihet duke përqafuar bashkëshortin e saj, teksa të dy ndiqnin me krenari performancën e djalit të tyre.
Në krah të tyre ishin edhe Romeo dhe Harper, ndërsa mbështetjen e saj e dha edhe e dashura e Cruz-it, Jackie Apostel.
Jackie kishte ndarë më herët në Instagram një fotografi ku shfaqej me një bluzë të verdhë me mbishkrimin:
Cruz Beckham më këndoi.
Një dedikim i ëmbël për Cruz-in, në një ditë të veçantë për karrierën e tij.
Cruz Beckham ka pasur një vit të ngjeshur në muzikë. Pas performancave në Britani dhe Evropë, ai dhe grupi i tij “The Breakers” u ngjitën edhe në skenën e festivalit Lollapalooza në Çikago.
Së fundmi, grupi publikoi EP-në e re “Wear & Tear”, e cila përmban pesë këngë.
“The Breakers” do të vijojnë me performancat në Leeds, ndërsa Cruz po punon për të konsoliduar gjithnjë e më shumë karrierën e tij si muzikant.
Edhe pse është pjesë e një prej familjeve më të famshme në botë, Cruz duket i vendosur të krijojë identitetin e tij artistik dhe të ndjekë një rrugë të pavarur nga suksesi i prindërve.
Dhe në këtë rrugëtim, ai duket se ka dy fansa të garantuar në çdo skenë: David dhe Victoria Beckham, të gatshëm të lënë edhe pushimet luksoze për të qenë pranë tij në momentet më të rëndësishme.
