Cheryl po përgatitet për një rikthim të madh në ekran, pas disa vitesh larg programeve televizive të kohës së artë. Këngëtarja 43-vjeçare është rikthyer në qendër të vëmendjes edhe përmes një marrëveshjeje të re si ambasadore e Nivea-s, të cilën e ka siguruar për të dytin vit radhazi.
Cheryl pozoi së fundmi në një set fotografik për të promovuar serumin e ri për sytë të markës, ku u shfaq elegante dhe në formë, e veshur me një fustan blu.
Por përtej fushatës së re publicitare, emri i këngëtares po qarkullon sërish në botën e televizionit. Sipas raportimeve, Cheryl është në bisedime për t’iu bashkuar sezonit të ri të “The Voice UK” në rolin e trajneres.
Nëse marrëveshja finalizohet, ky do të ishte rikthimi i saj më i rëndësishëm në televizion pas një mungese të gjatë.
Cheryl nuk është shfaqur në një program televiziv të kohës së artë prej gjashtë vitesh. Paraqitja e saj e fundit në këtë format ishte në “The Greatest Dancer” të BBC-së, në vitin 2020.
Gjatë kësaj periudhe, këngëtarja ka zgjedhur t’i kushtojë më shumë kohë jetës private dhe familjes, veçanërisht djalit të saj, Bear.
Në skenë, ajo u rikthye në vitin 2024 me turneun e ribashkimit të Girls Aloud, një rikthim emocional për grupin pas ndarjes nga jeta të anëtares Sarah Harding, shkruan DailyMail.
Tani, duket se Cheryl është gati të hapë një tjetër kapitull në karrierën e saj.
Sipas raportimeve, negociatat mes Cheryl dhe drejtuesve të “The Voice UK” kanë vazhduar prej disa muajsh.
Xhirimet e sezonit të ri pritet të nisin në shtator në Mançester dhe, nëse Cheryl bëhet pjesë e panelit, rikthimi i saj do të kishte një peshë të veçantë për fansat që e njohin prej vitesh si një prej figurave më të spikatura të televizionit britanik.
Këngëtarja ka një eksperiencë të gjatë në këtë rol, veçanërisht falë viteve të saj si gjyqtare në “X Factor”, ku u bë një prej personazheve më të njohura të formatit.
Pas gjashtë vitesh larg ekranit, Cheryl mund të jetë shumë pranë rikthimit pikërisht aty ku publiku është mësuar ta shohë: në karrigen e gjyqtares/trajnueses, duke vlerësuar dhe udhëzuar talentet e reja.
