Prej ditësh, rrjetet sociale janë mbushur me pretendime se Cristiano Ronaldo dhe Georgina Rodríguez do të kurorëzonin dashurinë këtë fundjavë. Megjithatë, raportimet e fundit hedhin poshtë këto spekulime.
Sipas revistës ¡HOLA!, çifti nuk ka në plan të organizojë një ceremoni martese gjatë kësaj fundjave, pavarësisht zhurmës së madhe që është krijuar në internet.
Thashethemet nisën pasi një televizion portugez publikoi atë që u pretendua se ishte një ftesë dasme. Sipas dokumentit, Ronaldo dhe Georgina do të martoheshin më 1 gusht në Quinta da Regaleira, një rezidencë historike në Sintra të Portugalisë.
Raportimet shkonin edhe më tej, duke pretenduar se të ftuarit ishin udhëzuar të visheshin me të zeza, një detaj që nxiti edhe më shumë diskutime në rrjet.
Megjithatë, burime pranë çiftit, të cituara nga ¡HOLA!, kanë sqaruar se ceremonia nuk do të zhvillohet këtë fundjavë. Gjithashtu, prona ku pretendohej se do të mbahej dasma vazhdon të jetë e hapur për vizitorët, çka përforcon dyshimet se nuk është rezervuar për një event privat.
Cristiano Ronaldo dhe Georgina Rodríguez janë në një lidhje prej afro dhjetë vitesh dhe konsiderohen një nga çiftet më të famshëm në botën e sportit dhe showbizit. Edhe pse lidhja e tyre nisi larg vëmendjes së mediave, me kalimin e viteve ata janë shndërruar në një nga dyshet më të ndjekura në botë.
Georgina ka treguar më herët se ëndërron një ceremoni intime dhe larg bujës mediatike. Ajo ka folur gjithashtu me emocion për unazën që i ka dhuruar Ronaldo, duke e cilësuar si një nga dhuratat më të veçanta që ka marrë ndonjëherë.
Aktualisht, çifti po shijon pushimet me familjen dhe miqtë, mes ditëve në plazh, golfit, stërvitjeve dhe kohës së kaluar me fëmijët.
Ndërkohë, Ronaldo po përgatitet për rikthimin te Al Nassr, ndërsa angazhimet sportive pritet ta bëjnë të vështirë organizimin e një dasme në një afat të shkurtër.
Sipas raportimeve, një ceremoni në fund të këtij viti ose gjatë vitit të ardhshëm shihet si skenari më i mundshëm. Deri atëherë, çifti vazhdon jetën në Arabinë Saudite, ku krahas karrierës së futbollistit kanë investuar edhe në prona luksoze.
