Ministria e Punëve të Brendshme ka shpallur kërkim ndërkombëtar për Aleksandar Lazarov (41 vjeç) nga Koçani, i cili para disa ditësh arriti të arratiset nga Stacioni i Policisë në Koçani ndërsa ishte në ndalim.
Sipas MVR-së, Lazarov kërkohet me urdhër arresti qendror dhe ndërkombëtar, me kërkesë të Gjykatës Themelore në Koçani, për dyshim të kryer të veprës penale sipas nenit 215 paragrafi 1 në lidhje me nenin 22 të Kodit Penal.
Rasti ka tërhequr vëmendje të madhe pasi 41-vjeçari nga Koçani arriti të arratiset nga ambientet e policisë ndërsa ishte mbajtur për pyetje. Më 9 korrik rreth orës 23:55, policia e arrestoi atë së bashku me një tjetër person në hyrje të fshatit Istibanja (Vinica), gjatë kontrollit të një veture „Subaru“. Në automjet u gjet dhe u sekuestrua një substancë e bardhë pluhur.
Një ditë më vonë, më 10 korrik në orën 20:35, ndërsa ishte në ndalim në Stacionin e Policisë në Koçani, Lazarov arriti të hapë një dritare dhe të arratiset. Pas kërkimeve disaditore, MVR tani e ka zgjeruar kërkimin edhe jashtë kufijve të shtetit duke shpallur kërkim ndërkombëtar për kapjen e tij.
