Ethe, gëzim dhe lapsa me ngjyra. Kjo është atmosfera që po mbretëron në të gjitha shkollat fillore ku tashmë ka nisur procesi i regjistrimit të nxënësve në klasë të parë. Për vogëlushët, kjo nuk është thjesht një procedurë administrative, por hapi i parë drejt një bote të madhe dijesh. Të buzëqeshur dhe kureshtarë, fëmijët tregojnë se tashmë njohin shkronjat, numrat dhe ngjyrat, ndërsa mezi presin të mësojnë të lexojnë dhe të shkruajnë.
Mësimdhënësit thonë se fëmijët që regjistrohen çdo vit po tregojnë përgatitje gjithnjë e më të mirë para fillimit të arsimit fillor.
Sipas të dhënave të shkollës fillore “26 Korriku”, këtë vit pritet të regjistrohen rreth 250 nxënës të klasave të para, ndërsa deri më tani procesin e regjistrimit e kanë përfunduar 40 fëmijë. Nga shkolla bëjnë të ditur se regjistrimi do të vazhdojë deri më 29 maj dhe pritet të formohen shtatë deri në tetë paralele të reja. Regjistrimet do të mbeten të hapura deri më 29 maj.
