Fakulteti Filozofik në Universitetin “Shën Kirili dhe Metodi” – Shkup duhet të veprojë sipas konkluzioneve të Inspektoratit Shtetëror të Arsimit (ISHA), i cili gjatë një mbikëqyrjeje të jashtëzakonshme ka konstatuar parregullsi në procesin e regjistrimit të studentëve në studimet e ciklit të dytë (master) dhe të tretë (doktoraturë).
Ministrja e Arsimit dhe Shkencës, Vesna Janevska, deklaroi se fakulteti tashmë ka filluar të veprojë sipas vërejtjeve të inspektoratit dhe se Ministria është në pritje të raportit përfundimtar, pas të cilit do të merret edhe vendimi final institucional për rastin.
“Janë konstatuar parregullsi në Fakultetin Filozofik, por jo në regjistrimin në studimet e ciklit të parë, por në regjistrimet në ciklin e dytë dhe të tretë të studimeve. Inspektorati Shtetëror i Arsimit ka vepruar, ka nxjerrë konkluzione dhe e ka informuar fakultetin, i cili duhet të veprojë. Sipas informacioneve që kam, fakulteti është duke vepruar dhe unë po e pres raportin përfundimtar, në mënyrë që pas skadimit të afatit për veprim, si ministre e autorizuar në këtë fushë, të marr edhe vendimin përfundimtar”, deklaroi Janevska, përcjell PressOnline.al
Sipas të dhënave të publikuara nga MKD.mk, studentë pa përfunduar studimet universitare janë regjistruar në programe master dhe më pas edhe në doktoraturë në Fakultetin Filozofik, duke mos i përmbushur kushtet e përcaktuara me Ligjin për Arsimin e Lartë.
Pas konstatimeve të Inspektoratit Shtetëror të Arsimit, këtyre studentëve u janë ndërprerë studimet.
Rasti, sipas të njëjtave burime, përfshin rreth një duzinë studentësh të regjistruar në studimet master dhe doktoraturë. Regjistrimi në studimet master në këtë fakultet kushton rreth 2.000 deri në 3.000 euro, ndërsa studimet e doktoraturës kushtojnë rreth 5.000 deri në 6.000 euro.
Studentët, pas ndërprerjes së studimeve, kanë kërkuar kthimin e mjeteve të paguara për regjistrim, por deri tani nuk kanë marrë përgjigje nga zyra e dekanit.
Jozyrtarisht, disa prej tyre kanë angazhuar edhe përfaqësim ligjor, ndërsa pas ndërhyrjes së Inspektoratit Shtetëror të Arsimit, situata është zhvendosur edhe në nivel administrativ brenda fakultetit.
Dekan i Fakultetit Filozofik është Oliver Bakreski, i cili gjatë periudhës kur janë kryer regjistrimet ka ushtruar funksionin e prodekanit.(PressOnline.al)
