Zëvendëskryeministri dhe një nga liderët e koalicionit VLEN, Izet Mexhiti, ka deklaruar se nuk është i bindur se zgjedhja e Qeverisë me parimin e Badenterit është zgjidhja më e mirë, por theksoi se kjo ide mund të diskutohet dhe të analizohet në bashkëpunim me ekspertë të fushës, shkruan PressOnline.al
Sipas Mexhitit, zgjedhja e Qeverisë me Badenter nuk nënkupton domosdoshmërisht faktorizimin e shqiptarëve, por më tepër faktorizimin e komuniteteve jomaqedonase në përgjithësi. Ai paralajmëroi se kjo çështje duhet menduar me kujdes, duke kujtuar praktikat e së kaluarës kur disa deputetë ndryshonin përkatësinë etnike sipas interesit politik.
“Zgjedhja e Qeverisë me Badenter nuk nënkupton faktorizim të shqiptarëve, por faktorizim të jomaqedonasve. Kjo duhet menduar mirë, sepse kemi pasur raste kur deputetë herë deklaroheshin maqedonas, herë vlleh apo pjesë e ndonjë komuniteti tjetër”, tha Mexhiti.
I pyetur në emisionin Click Plus nëse mund të ketë një takim me liderin e BDI-së, Ali Ahmeti, Mexhiti u shpreh se nuk ekziston asnjë armiqësi personale mes tyre.
“Ne hasmëri nuk kemi, armiqësi private nuk kemi. Kemi pasur dallime politike”, deklaroi ai, përcjell PressOnline.al
Mexhiti theksoi se aktualisht është i fokusuar 100 për qind në konsolidimin e koalicionit VLEN, me synimin që ai të shndërrohet në një subjekt të unifikuar politik. Megjithatë, ai nuk përjashtoi mundësinë e bisedimeve me të gjitha subjektet politike shqiptare për çështje që kanë rëndësi kombëtare.
“Për çështje kombëtare, jetike, jemi të gatshëm të ulemi të bisedojmë. Demokracia e njeh se ka tema që janë mbi politikën ditore dhe për ato çështje, jo vetëm me zotëri Ahmetin, por me secilin subjekt shqiptar, jemi të hapur për dialog”, përfundoi Mexhiti.


