Më shumë se dy vite zgjati procesi gjyqësor me motive politike, kundër kryetarit të CIVIL – Qendra për Liri, gazetar dhe mbrojtës i të drejtave të njeriut, Xhabir Derala, i ngritur nga Hristijan Mickoski – atëherë udhëheqës i partisë opozitare VMRO-DPMNE, tani kryeministër i Republikës së Maqedonisë së Veriut, dhe i cili u drejtua nga bashkëpunëtori i tij i ngushtë dhe ministri aktual i Punëve të Brendshme, Pançe Toshkovski. Ata ngritën padi për shpifje kundër kolegut tonë, për një tekst të marrë nga media të tjera. Ky proces gjyqësor përfundoi pas konfirmimit të vendimit të Gjykatës Themelore Civile në Shkup nga Gjykata e Apelit në favor të paditësit.
Ky proces gjyqësor është një dëshmi flagrante që kryeministri aktual dhe udhëheqësi i VMRO-DPMNE vazhdon praktikën e paraprakut të tij, duke konfirmuar lidhjen e ngushtë mes pushtetit dhe drejtësisë. Me këtë po minohen liritë mediatike dhe liria e shprehjes, duke përcjellë mesazh të qartë për mediat, redaktorët dhe gazetarët se shteti po shkon drejt një errësire mediatike. Përndjekje gjyqësore, presione, kërcënime dhe fushata shpifjeje janë “siguruar” për të gjithë ata që nuk sillen sipas “rregullave” të pushtetit.
CIVIL – Qendra për Liri kërkon respektimin e vlerave demokratike dhe të drejtave dhe lirive të njeriut, parime në të cilat janë thellësisht të rrënjosura edhe liria e shprehjes, liritë mediatike dhe të drejtat e punonjësve mediatikë, dhe qëndron fuqishëm kundër çdo lloj kërcënimi dhe shtypjeje të fakteve dhe së vërtetës.
Në një shoqëri ku politikanët përpiqen të heshtin çdo zë kritik, detyra jonë është të flasim edhe më fuqishëm. Heshtja është mjet i frikës, por e vërteta nuk njeh heshtje. Gazetarët dhe aktivistët nuk janë armiq, ata janë roje të demokracisë. Pa fjalë të lirë, nuk ka shtet të lirë.
Ne qëndrojmë qartë në qëndrim që ky vendim nuk është vetëm përpjekje për të heshtur Deralën, por një përpjekje për të heshtur gazetarët, aktivistët, intelektualët publikë dhe krijuesit e opinionit publik, si dhe çdo person që përdor podiumin publik për të folur kundër padrejtësive.
Politikanët si Mickoski dhe Toshkovski, që frikësohen nga kritika publike, nuk ndërtojnë shtet – ata e copëtojnë atë. Ata nuk duan të vërtetën, por heshtjen. Por liria nuk jeton në heshtje – ajo jeton në zë, në guximin për të thënë atë që pushteti nuk do të dëgjojë.
CIVIL mbështet Deralën në betejën e vazhdueshme për lirinë e shprehjes, sepse kjo është betejë për dinjitet, drejtësi, të ardhme. Të heshtësh do të thotë të dorëzosh zërin tënd. Dhe kur gazetarët dhe aktivistët qytetarë heshtin, gënjeshtra flet në emrin e tyre. Prandaj, nuk do të lejojmë që asnjë pushtetar të na marrë të drejtën për të folur – sepse kjo është hapi i parë drejt marrjes së të gjitha të drejtave të tjera.
Liria e shprehjes është themeli i çdo shoqërie demokratike. Ajo nuk është luks, as dhuratë nga pushteti, por e drejtë e patjetërsueshme e çdo njeriu.
CIVIL
