Një ngjarje e dhimbshme dhe e komplikuar ka zënë vend në gjykatat britanike, ku një aktor i njohur, Robert Rajhpaul, përballet me motrën e tij, Precious, për një trashëgimi të madhe pas vdekjes së nënës së tyre, Milda Rajhpaul, në vitin 2024.
Roberti, i cili aktualisht jeton në një strehë për të pastrehët bashkë me qenin e tij, Twinkle, ka ngritur një padi për të kontestuar testamentin e fundit të nënës së tij. Ai akuzon motrën se e ka detyruar nënën të ndryshojë dokumentin e trashëgimisë, duke e lënë atë jashtë ndarjes së pasurisë.
Pasuria e trashëguar nga Milda vlerësohet në rreth 1.2 milionë paund, ku pjesa më e madhe përfshin një pronë në Londrën perëndimore, e cila vetë vlerësohet rreth 900 mijë paund. Testamentin e fundit, i hartuar në gusht 2023, e kalon tërë pasurinë te Precious, e cila kishte kujdesur për nënën në vitet e fundit të jetës së saj.
Roberti pretendon se motra e tij e mbajti nënën të izoluar nga të afërmit dhe se ajo kishte ndryshuar bravat e shtëpisë për të penguar vizitat e familjarëve. Ai shprehet se kjo ishte një mënyrë për të parandaluar nënën që të kalonte një pjesë të pasurisë në emrin e tij.
“Precious ka bërë gjithçka për ta mbajtur nënën time të izoluar. Ajo e shkëputi telefonin dhe e pengoi çdo kontakt me ne,” tha Roberti gjatë seancës në Gjykatën e Qarkut të Londrës Qendrore.
Roberti vë në dyshim vlefshmërinë e testamentit, duke argumentuar se nëna e tij nuk kishte kapacitetin mendor të nevojshëm për të marrë një vendim të tillë dhe se dokumenti ishte përgatitur nën ndikim të pandershëm. Ai gjithashtu akuzon motrën për organizimin e ceremonisë së djegies së trupit të nënës, ndonëse ajo kishte shprehur dëshirën për t’u varrosur sipas traditës.
Çështja e trashëgimisë përfshin gjithashtu një përplasje mbi shumën e parave që Milda kishte lënë në llogaritë e saj bankare. Ndërsa Precious thotë se nëna la vetëm 16,530 paund, Roberti insistonte se shuma reale ishte 315 mijë paund.
Roberti ka paraqitur një kërkesë sipas ligjit britanik të trashëgimisë, duke pretenduar se kishte nevojë për mbështetje financiare nga pasuria e nënës. Ndërkohë, Precious e mohon çdo akuzë dhe mbron vlefshmërinë e testamentit, duke ngritur një kundërpadi për ta mbrojtur atë.
Avokatja e Precious, Nicola Phillipson, theksoi se pretendimet e Robertit nuk janë të mbështetura në prova të mjaftueshme dhe se ai nuk ka paraqitur dokumente mjekësore që të vërtetojnë akuzat e tij.
Seanca e gjykatës u shty për t’i dhënë Robertit kohë për të siguruar një avokat dhe për të përgatitur pretendimet e tij. Gjykatësi Nigel Gerald e paralajmëroi atë se akuzat janë të rënda dhe se procesi mund të sjellë shpenzime të larta, duke theksuar se pa prova bindëse, padia mund të rrëzohet. Lufta për pasurinë e nënës mbetet e hapur dhe tensionet mes dy vëllezërve pritet të vazhdojnë në gjykatë.
