Ish-ylli i futbollit amerikan Tom Brady përflitet se ka nisur një lidhje romantike me supermodelen Candice Swanepoel, disa vite pas divorcit nga modelja braziliane Gisele Bündchen.
Sipas raportimeve të mediave amerikane, Brady, 49 vjeç, dhe Swanepoel, 38 vjeçe, janë duke u takuar prej disa muajsh dhe po kalojnë gjithnjë e më shumë kohë së bashku. Një burim i cituar nga Us Weeklypretendon se romanca e tyre nuk është diçka e re, ndërsa People raportoi më 25 tetor se të dy po shijojnë kohën që kalojnë së bashku.
Fakti që të dy jetojnë në Miami ua lehtëson takimet, sipas burimit të cituar nga People. Megjithatë, as Brady dhe as Swanepoel nuk e kanë konfirmuar publikisht lidhjen, ndërsa përfaqësuesit e tyre nuk kanë dhënë një koment zyrtar.
Tom Brady dhe Gisele Bündchen u martuan në vitin 2009 dhe njoftuan divorcin në vitin 2022, pas 13 vitesh martesë. Çifti ka dy fëmijë së bashku, Benjamin dhe Vivian. Brady ka gjithashtu një djalë, Jack, nga marrëdhënia e mëparshme me aktoren Bridget Moynahan.
Pas divorcit, emri i ish-kampionit të NFL-së është lidhur me disa personazhe të njohura, përfshirë modelen Irina Shayk dhe influencuesen Alix Earle. Megjithatë, jeta e tij sentimentale ka mbetur kryesisht larg deklaratave të drejtpërdrejta publike.
Në janar të këtij viti, Brady i tha revistës People se kishte pak kohë për jetën personale, pasi ishte i përqendruar te puna dhe fëmijët e tij.
E dua punën time dhe i dua fëmijët e mi
-u shpreh ai, duke theksuar rëndësinë që ka për të të qenit një prind i pranishëm.
Candice Swanepoel është një nga modelet më të njohura të Victoria’s Secret. Modelja nga Afrika e Jugut u bë pjesë e markës në vitin 2010 dhe ka marrë pjesë në shumë prej sfilatave të saj më të rëndësishme.
Jashtë pasarelave, ajo ka ruajtur një profil relativisht privat për sa i përket jetës sentimentale. Swanepoel ka qenë në një marrëdhënie shumëvjeçare me modelin brazilian Hermann Nicoli. Ata u fejuan në vitin 2015, por u ndanë në vitin 2018. Nga kjo marrëdhënie kanë dy djem, Anacã dhe Ariel.
Në intervista të mëparshme, modelja ka folur për sfidën e balancimit të mëmësisë me karrierën dhe rëndësinë e kujdesit ndaj vetes.
Sipas burimeve të cituara nga mediat, Brady dhe Swanepoel po përpiqen ta mbajnë marrëdhënien larg vëmendjes së publikut. Deri tani, nuk ka pasur një deklaratë të përbashkët apo një konfirmim të drejtpërdrejtë nga dy protagonistët.
Ndërkohë, në rrjetet sociale kanë qarkulluar edhe spekulime që e lidhin këtë romancë të pretenduar me raportimet për një krisje të miqësisë mes Swanepoel dhe modeles Joan Smalls. Disa pretendime sugjerojnë se Tom Brady mund të ketë lidhje me këtë situatë, por këto teori nuk janë verifikuar në mënyrë të pavarur dhe nuk ka prova të konfirmuara që të vërtetojnë një lidhje mes dy çështjeve.
Për momentin, raportimet për romancën mes Tom Brady-t dhe Candice Swanepoel vazhdojnë të tërheqin vëmendjen e mediave rozë, ndërsa mbetet për t’u parë nëse ata do të vendosin ta konfirmojnë publikisht marrëdhënien e tyre.
