Irani ka deklaruar se shtatë anije cisternë nafte janë qëlluar dhe kanë pësuar dëmtime në Ngushticën e Hormuzit, në atë që e cilëson si numrin më të madh të anijeve të goditura brenda një dite që nga fillimi i luftës mes Shteteve të Bashkuara, Izraelit dhe Iranit, më 28 shkurt.
Garda Revolucionare Islamike e Iranit (IRGC) bëri të ditur se katër prej anijeve po transportonin naftë kur u shënjestruan dhe morën flakë gjatë natës. Sipas deklaratës, tri anijet e tjera u nxorën jashtë funksionit, pasi goditën mina detare.
Pretendimet e autoriteteve iraniane nuk janë verifikuar në mënyrë të pavarur. Në raportim nuk u dhanë hollësi për viktima të mundshme, as për flamujt e vendeve nën të cilët lundronin anijet e përfshira në incidentet e raportuara.
Në të njëjtën deklaratë, Garda Revolucionare paralajmëroi se konflikti mund të zgjerohet nëse Uashingtoni ndërhyn për të ndihmuar anijet cisternë të kalojnë në pjesë të tjera të ngushticës. Ajo kërcënoi se mund të godasë bazat ushtarake amerikane në Lindjen e Mesme, në rast se vazhdon kjo politikë.
“Ushtria amerikane duhet ta dijë se, nëse kjo prirje vazhdon, konflikti do të shtrihet edhe në bazat e saj në rajon”, thuhet në deklaratën e IRGC-së, të publikuar në faqen e saj zyrtare Sepah. Forcat iraniane e cilësuan mesazhin si një paralajmërim serioz ndaj Shteteve të Bashkuara.
Ngushtica e Hormuzit është një nga rrugët detare më të rëndësishme për tregtinë globale të energjisë. Para fillimit të luftës, përmes saj kalonte rreth një e pesta e furnizimit botëror me naftë. Irani pretendon se ushtron kontroll mbi këtë korridor strategjik dhe ka sulmuar vazhdimisht anije që, sipas tij, përpiqen të kalojnë pa autorizimin e Teheranit.
Nga ana tjetër, ushtria amerikane ka shtuar shoqërimin e anijeve që kalojnë nëpër ngushticë, ndërsa Irani është përgjigjur duke intensifikuar sulmet, sipas raportimeve të publikuara.
Presidenti amerikan Donald Trump reagoi të enjten ndaj zhvillimeve, duke akuzuar Iranin se po përpiqet të rrisë çmimet e naftës përpara zgjedhjeve të mesit të mandatit në Shtetet e Bashkuara.
