Presidenti ukrainas Volodymyr Zelensky paralajmëroi të martën mbrëma (6 tetor) për një sulm masiv të mundshëm nga Rusia ndaj Ukrainës, duke iu referuar informacioneve të reja nga shërbimet ukrainase të inteligjencës.
“Ka informacione të reja që tregojnë se Rusia po përgatit një sulm masiv”, deklaroi Zelensky në një mesazh të regjistruar me video, pa dhënë detaje të mëtejshme mbi kohën apo formën që mund të marrë sulmi.
Ai tha se shërbimet përgjegjëse dhe Forcat Ajrore të Ukrainës janë në gatishmëri, por theksoi se aftësia e tyre për t’u përgjigjur varet nga mjetet mbrojtëse në dispozicion.
Zelensky theksoi se përballimi efektiv i sulmeve ruse varet në një masë të madhe nga ndihma ushtarake e aleatëve të Ukrainës. Sipas tij, çdo vend që disponon sistemet e nevojshme të mbrojtjes ajrore mund të kontribuojë në mbrojtjen e qyteteve dhe infrastrukturës kritike ukrainase.
“Është thelbësore që të ketë vullnet politik, veçanërisht në SHBA dhe Europë”, tha Zelensky, duke përsëritur kërkesën e Kievit për sisteme shtesë kundërajrore dhe municione.
