Kryetari i LSDM-së, Venko Filipçe, akuzoi qeverinë e Hristijan Mickoskit se po e bllokon rrugën evropiane të vendit dhe se në hapësirën mediatike ka ndikim të fuqishëm serb, si dhe ndikim të lidhur me qarqe pranë Viktor Orbanit.
Deklaratat e tij u bënë në prag të vizitës së presidentes së Komisionit Evropian, Ursula von der Leyen, e cila më 2 tetor do të qëndrojë në Shkup.
Filipçe tha se LSDM-ja gjatë dy viteve të fundit ka paralajmëruar për ndikimin serb, ndikimin e lidhur me Orbanin dhe kredinë hungareze, përmes së cilës, sipas tij, në vend po hyjnë para kineze. Ai përsëriti qëndrimin se qeverinë aktuale e konsideron antievropiane.
Lideri i LSDM-së ngriti akuza edhe për gjendjen në media. Ai pretendoi se kryeministri kontrollon një pjesë të hapësirës mediatike dhe se një numër i konsiderueshëm mediash janë të lidhura me pronarë të afërt me Orbanin.
“Mendoni se Fon der Lajen nuk e di se kryeministri këtu kontrollon mediat?”, tha Filipçe.
Ai gjithashtu pretendoi se në vend janë regjistruar edhe media serbe në një mënyrë që, sipas tij, është në kundërshtim me ligjin.
