Nicole Scherzinger pësoi një djegie të dhimbshme në këmbë vetëm një orë para se të ngjitej në skenë me Pussycat Dolls në Düsseldorf të Gjermanisë, por pavarësisht incidentit vendosi të mos e anulonte koncertin.
Këngëtarja 48-vjeçare zbuloi në rrjetet sociale se i ishte derdhur ujë i valë mbi këmbë pak para performancës në PSD Bank Dome, më 26 shtator.
Scherzinger publikoi një fotografi të dëmtimit, ku shiheshin skuqje dhe flluska të dukshme në lëkurë. Megjithatë, ajo e bëri të qartë se nuk kishte ndërmend të tërhiqej nga koncerti.
Asgjë si uji i valë që të bie në këmbë një orë para performancës. Por shfaqja duhet të vazhdojë
-shkroi ajo në Instagram.
Pas koncertit, artistja falënderoi edhe publikun e Düsseldorf-it për mbështetjen gjatë performancës.
Faleminderit Düsseldorf që më mbajtët në këmbë. Shihemi së shpejti, Amsterdam
-shkroi Scherzinger.
Dhe vetëm një ditë më vonë, ajo vazhdoi me programin e turneut. Scherzinger u ngjit në skenë së bashku me Ashley Roberts dhe Kimberly Wyatt në Ziggo Dome të Amsterdamit, duke vijuar turneun “PCD Forever”.
Turneu evropian i Pussycat Dolls po zhvillohet prej disa muajsh dhe përfshin një seri koncertesh në qytete të ndryshme. Pas Amsterdamit, grupi pritet të vijojë me datat në Mbretërinë e Bashkuar dhe Irlandë, ndërsa turneu është planifikuar të përfundojë në Londër më 13 tetor.
Incidenti erdhi në një moment intensiv për grupin, i cili është rikthyer në skenë pas një periudhe të gjatë larg turneve. Përkundër dëmtimit të papritur, Scherzinger zgjodhi të performonte sipas planit, duke mos lejuar që aksidenti i ndodhur pak para koncertit të ndryshonte programin.
