Robert Pattinson po hyn në një prej historive më të debatueshme të televizionit amerikan, duke marrë përsipër rolin e gazetarit Chris Hansen në filmin e ri “Primetime”.
Filmi i A24 rikthehet te historia e “To Catch a Predator”, emisionit të njohur të “Dateline NBC” që përdorte operacione të fshehta për të ekspozuar burra që dyshohej se kërkonin të kryenin marrëdhënie seksuale me të mitur. “Primetime” pritet të shfaqet në kinema më 25 shtator.
Por filmi nuk synon të jetë thjesht një rikrijim i emisionit. Regjisori Lance Oppenheim e ka shndërruar historinë në një dramë më të errët mbi televizionin, famën, moralin dhe mënyrën se si etja për audiencë mund të ndryshojë një histori.
Pikërisht kjo ishte ajo që e tërhoqi Pattinson te projekti.
Ajo që më interesonte më shumë ishin teknikalitetet e përpjekjes për të realizuar një emision hit. Kur arrin një nivel të caktuar shikueshmërie ose kur përfshihen shuma të mëdha parash, papritur tema nuk ka më rëndësi. Ti je thjesht një hit dhe gjykohesh sipas të njëjtave standarde, me të njëjtën pritshmëri komerciale
-tha Pattinson për Associated Press.
Filmi fokusohet në vitin 2006, kur “To Catch a Predator” ishte kthyer në një fenomen televiziv. Në atë periudhë, emisioni ndiqej nga miliona shikues dhe Chris Hansen ishte bërë një figurë e njohur e kulturës popullore.
Por pas suksesit fshihej një histori shumë më e komplikuar.
Operacionet e emisionit dhe pasojat e një prej rasteve më të rënda të tij ngritën pyetje mbi kufijtë mes gazetarisë, argëtimit dhe spektaklit televiziv. Një incident tragjik në Teksas në vitin 2006 u bë më pas pjesë e debatit që rrethoi emisionin dhe çoi në hetime e padi.
Pikërisht ky kapitull është një nga elementet qendrore të “Primetime”. Filmi nuk përpiqet vetëm të tregojë se çfarë ndodhte para kamerave, por edhe të eksplorojë presionin për të prodhuar vazhdimisht materiale që tërheqin publikun.
Pattinson, ndërkohë, është pothuajse i panjohshëm në rolin e Hansen. Aktori ka ndryshuar zërin, mënyrën e të folurit dhe gjuhën e trupit për t’iu afruar figurës së gazetarit televiziv. Performanca e tij është vlerësuar gjerësisht nga kritikët, edhe pse vetë filmi ka shkaktuar reagime më të ndara për mënyrën se si trajton historinë.
Interesant është fakti se Pattinson fillimisht nuk kishte plan të luante në film. Ai ishte i përfshirë si producent dhe po ndihmonte në zhvillimin e projektit, por gjatë procesit u bind se roli i Chris Hansen ishte një mundësi që nuk duhej ta humbiste.
Ndërsa “Primetime” është një vepër dramatike e frymëzuar nga ngjarje reale dhe jo një dokumentar, vetë Chris Hansen nuk e ka miratuar mënyrën se si portretizohet. Ai e ka kritikuar projektin dhe ka kërkuar që filmi të etiketohet si trillim, ndërsa A24 ka mbrojtur të drejtën për ta realizuar pa miratimin e tij.
Tashmë, Robert Pattinson po e vendos historinë e “To Catch a Predator” sërish përballë publikut, por këtë herë pyetja nuk është vetëm se kush po kapet para kamerave. “Primetime” kërkon të tregojë çfarë ndodh kur vetë televizioni bëhet i fiksuar pas shikueshmërisë.
