Një studim pilot i kryer nga inxhinierë të UCLA ka zbuluar se përtypja e çamçakëzit mund të çlirojë deri në 3,000 grimca mikroplastike në pështymë, bazuar në testimin e 10 markave të ndryshme çamçakëzësh, si me përbërës natyralë, ashtu edhe sintetikë. Studiuesit zbuluan se çamçakëzi çlironte mesatarisht 100 grimca mikroplastike për gram, ndërsa disa lloje çamçakëzi çlironin deri në 600 grimca për gram.
Sipas vlerësimeve të tyre, një person që përtyp 160–180 copë çamçakëz në vit mund të konsumojë rreth 30,000 grimca mikroplastike në total. Megjithatë, studiuesit theksojnë se aktualisht nuk ka prova që mikroplastikat janë të dëmshme për shëndetin e njeriut. Gjithashtu, studimi ende nuk është publikuar në një revistë shkencore.
Ndërkaq, një ekip shkencëtarësh nga Filadelfia, SHBA ka krijuar një çamçakëz eksperimental me bazë bimore që synon të ulë ngarkesën virale në gojë, duke kapur dhe neutralizuar viruset para se ato të përhapen. Qëllimi i këtij produkti është reduktimi i transmetimit të viruseve respiratorë përmes pështymës dhe nuk synon të zëvendësojë vaksinat apo trajtimet e aprovuar.
Çamçakëzi përmban proteina antivirale të prodhuara nga bimët që veprojnë lokalisht në kavitetin oral. Një version i tij është i pasuruar me një proteinë të quajtur ACE2, e cila lidhet me proteinën “spike” të SARS‑CoV‑2 dhe “kap” viruset në pështymë. Kjo lidhje redukton aftësinë e virusit për t’u futur në qelizat njerëzore. Studime laboratorike kanë treguar se ky çamçakëz mund të ulë ngarkesën virale SARS‑CoV‑2 në mostrat e pështymës me më shumë se 95%, duke parandaluar futjen e virusit në qeliza në teste in vitro. Hulumtuesit gjithashtu po punojnë për një version tjetër të çamçakëzit që përfshin në formulë proteina të tjera bimore.
