Emisioni i njohur amerikan “Jimmy Kimmel Live!” mund të jetë pranë fundit të një epoke 24-vjeçare, sipas një raportimi të fundit, megjithëse rrjeti ABC i ka mohuar pretendimet dhe i ka cilësuar ato si spekulative.
Sipas burimeve të cituara nga Page Six, kontrata e Jimmy Kimmel nuk pritet të zgjatet pas sezonit të ardhshëm dhe emisioni mund të përfundojë në maj të vitit 2027. Kimmel e drejton programin që nga viti 2003, duke u bërë një nga prezantuesit më jetëgjatë të televizioneve amerikane të mbrëmjes.
Një burim i cituar nga Page Six pretendoi se vendimi i mundshëm nuk do të lidhej me përplasjet e vazhdueshme politike të Kimmel me Donald Trump, por me ndryshimet dhe përpjekjet për uljen e kostove në kompaninë Disney, pronare e ABC-së.
Pavarësisht raportimit, ABC Entertainment reagoi duke mohuar se është marrë një vendim për përfundimin e programit.
Ky informacion është i pasaktë, çdo raportim në lidhje me të ardhmen e emisionit në këtë moment është thjesht spekulativ
-deklaroi një zëdhënës i ABC Entertainment.
Edhe pse kontrata e Kimmel është raportuar më parë se zgjatet deri në vitin 2027, rrjeti nuk ka konfirmuar se “Jimmy Kimmel Live!” do të përfundojë pas sezonit të ardhshëm.
Spekulimet për të ardhmen e programit vijnë pas një periudhe të vështirë. Në shtator 2025, emisioni u pezullua përkohësisht pas komenteve të Kimmel lidhur me vrasjen e Charlie Kirk, duke shkaktuar reagime të forta politike. Programi më pas u rikthye në transmetim.
Ndërkohë, Kimmel vazhdon të jetë në krye të emisionit dhe së fundmi shënoi transmetimin e episodit të 4,000-të, një moment i rëndësishëm për një program që ka qenë pjesë e televizionit amerikan që nga viti 2003.
Për momentin, pra, fundi i “Jimmy Kimmel Live!” mbetet i pakonfirmuar, ndërsa ABC këmbëngul se çdo pretendim për të ardhmen e emisionit është ende spekulim.
