Penélope Cruz dhe Javier Bardem kanë mbërritur në Venecia për Festivalin e 83-të Ndërkombëtar të Filmit, ku do të prezantojnë filmin e tyre të ri, “Bunker”.
Çifti spanjoll u fotografua dorë për dore teksa mbërriti në Lido, duke tërhequr vëmendjen e fotografëve me paraqitjen e tyre.
Për mbërritjen në Venecia, aktorja 52-vjeçare zgjodhi një fustan të zi elegant, të zbukuruar në njërën anë me një broshë të artë.
Ajo e kompletoi veshjen me një çantë kamoshi në ngjyrë kaki, taka të zeza dhe syze dielli. Në momentin kur po hipte në taksinë ujore, Cruz hoqi takat për ta pasur më të lehtë kalimin në anije.
Javier Bardem, 57 vjeç, u shfaq me një stil më të thjeshtë, duke veshur një këmishë blu, xhinse dhe atlete të bardha.
Cruz dhe Bardem ndodhen në festival për premierën e “Bunker”, thrillerit psikologjik të regjisorit Florian Zeller.
Në film, ata interpretojnë për herë të parë një çift bashkëshortësh. Bardem luan një arkitekt që pranon të ndërtojë një bunker për një miliarder të teknologjisë, një vendim që fillon të ndikojë edhe në marrëdhënien e tij me bashkëshorten, të interpretuar nga Cruz.
Filmi është pjesë e garës zyrtare të Festivalit të Venecias për Luanin e Artë.
Penélope Cruz dhe Javier Bardem janë të martuar prej 16 vitesh dhe kanë dy fëmijë, Leo dhe Luna.
Çifti ka folur edhe më parë për mënyrën se si përpiqet të balancojë karrierën me jetën familjare. Bardem ka treguar se, që nga lindja e fëmijës së tyre të parë, ata kujdesen që të paktën njëri prej tyre të jetë gjithmonë në shtëpi kur tjetri angazhohet në një projekt të ri.
“Bunker” shënon një tjetër bashkëpunim të çiftit në ekran, ndërsa prania e tyre së bashku në Venecia ka tërhequr vëmendjen e fotografëve dhe publikut të festivalit.
