Christina Applegate është kthyer në shtëpi pas një qëndrimi katërmujor në spital, ndërsa raportimet e mediave amerikane bëjnë të ditur se aktorja po ndihet më mirë dhe po vazhdon rikuperimin.
Ende nuk është konfirmuar nëse shtrimi i saj lidhej drejtpërdrejt me sklerozën e shumëfishtë (MS), sëmundjen autoimune me të cilën është diagnostikuar që nga viti 2021.
Përfaqësuesi i aktores nuk ka dhënë detaje mbi arsyen e hospitalizimit, duke theksuar vetëm se Applegate ka kaluar prej vitesh sfida të shumta shëndetësore.
Pak kohë pas shtrimit, ylli i Hollywood-it falënderoi ndjekësit për mbështetjen e vazhdueshme përmes një postimi në Instagram, ku u shpreh se, megjithëse problemet shëndetësore janë bërë pjesë e përditshmërisë së saj, ajo vazhdon të ndihet e fortë dhe sheh përmirësime nga dita në ditë.
Edhe aktori David Faustino, kolegu i saj në serialin ikonë “Married… with Children”, foli për gjendjen e saj, duke thënë se periudha nuk ka qenë e lehtë, por Christina nuk e ka humbur optimizmin dhe sensin karakteristik të humorit.
Applegate ka qenë gjithmonë e hapur për betejën e saj me shëndetin. Në vitin 2025 ajo zbuloi se ishte shtruar në spital për shkak të një infeksioni në veshka, ndërsa në një intervistë të muajit shkurt tregoi se skleroza e shumëfishtë e detyron shpesh të kalojë ditë të tëra në shtrat.
Pavarësisht vështirësive, aktorja ka theksuar se përpiqet të ruajë normalitetin në jetën e saj dhe të jetë pranë vajzës së saj, Sadie, duke e shoqëruar çdo ditë në shkollë sa herë që gjendja shëndetësore ia lejon.
