Cruz Beckham ka rikthyer vëmendjen te marrëdhënia e tensionuar me vëllain e tij të madh, Brooklyn Beckham, pas publikimit të këngës së re “Seeing Red”, e cila ka nxitur një valë spekulimesh në rrjetet sociale.
21-vjeçari, djali i David dhe Victoria Beckham, prezantoi projektin e ri muzikor si pjesë e EP-së së tij “Wear & Tear”. Menjëherë pas publikimit, fansat nisën të analizojnë tekstin, duke aluduar se disa vargje mund të jenë frymëzuar nga raporti i ftohtë me Brooklyn.
Shprehje si “Kam parë të kuq për aq kohë sa mbaj mend” dhe “Në momentin që e publikoj këtë, gjithçka merr fund” u interpretuan nga ndjekësit si referenca të mundshme ndaj konfliktit familjar që ka qenë në qendër të mediave prej muajsh.
Megjithatë, vetë Cruz Beckham ka mohuar se kënga lidhet drejtpërdrejt me situatën në familjen e tij.
Ai shpjegoi se “Seeing Red” është një këngë me nota humori, e frymëzuar nga momentet e frustrimit gjatë garave sportive dhe jo një sulm ndaj vëllait të tij.
Edhe videoklipi i këngës përmban skena me ndeshje futbolli dhe përplasje mes lojtarëve, një element që shumë e kanë parë si një homazh për karrierën legjendare të David Beckham.
Pavarësisht interpretimeve të shumta, Cruz ka lënë të kuptohet edhe më herët se shpreson që marrëdhënia me Brooklyn të përmirësohet në të ardhmen, edhe pse përplasjet mes tyre kanë qenë shpesh objekt diskutimi në media.
