Në prag të procesit zgjedhor, raportohet për presion të drejtpërdrejtë ndaj qytetarëve për orientim politik në votim, përfshirë raste ku kryetari i komunës paralele për Fushë Kosovën, Aleksandar Trajkovic, ka ndikuar mbi qytetarë për të votuar Listën Serbe.
Kështu mbrëmjen e së enjtes, Policia e Kosovës ka arrestuar pikërisht Trajkoviq në fshatin Uglarë të Graçanicës, nën dyshimin për përfshirje në veprën penale “dhënia ose marrja e ryshfetit në lidhje me votimin”.
Ryshfet për vota, arrestohet një i dyshuar në Graçanicë
Sipas raportit 24-orësh të Policisë së Kosovës, rasti është regjistruar më 4 qershor, rreth orës 20:00. Gjatë hetimeve janë intervistuar dy dëshmitarë, ndërsa më pas është kryer kontroll në shtëpinë e të dyshuarit.
Gjatë bastisjes, policia ka sekuestruar materiale që lidhen me procesin e votimit, si dhe katër telefona mobilë, të cilët janë marrë si prova materiale.
Me urdhër të prokurorit të rastit, Trajkoviq është ndaluar dhe është dërguar në mbajtje, ndërsa hetimet për zbardhjen e plotë të rrethanave po vazhdojnë.
