LSDM ka akuzuar VMRO-DPMNE-në se po tregohet hipokrite në qëndrimet e saj ndaj Evropës dhe Bullgarisë, duke pretenduar se në Qeverinë e kryeministrit Hristijan Mickoski ka funksionarë me pasaporta dhe shtetësi bullgare. Nga LSDM thonë se refuzimi i propozim-ligjit të tyre, me të cilin ministrat, zëvendëskryeministrat dhe anëtarët e Qeverisë nuk do të mund të kishin shtetësi të dyfishtë, është dëshmi se pushteti po fsheh të vërtetën nga qytetarët. Sipas partisë opozitare, pikërisht ata që me vite kanë folur kundër Evropës, tashmë e kanë siguruar atë për vete përmes dokumenteve bullgare.
Në vazhdim po ua përcjellim komunikatën e plotë të LSDM-së:
Qytetarët morën edhe një konfirmim nga VMRO-GOK, qeveria e Mickoskit është plot me pasaporta bullgare. Refuzuan ta pranojnë propozim-ligjin e LSDM-së, me të cilin ministrat, zëvendëskryeministrat dhe anëtarët e Qeverisë nuk do të mund të kishin shtetësi të dyfishtë.
Pse?
Sepse atëherë gjysma e Qeverisë së Mickoskit do të duhej të largohej.
E gjithë Qeveria mund të jetë e përbërë nga shtetas bullgarë, por pakicat nuk mund të hyjnë në Kushtetutë.
Çfarë hipokrizie, çfarë mashtrimi ndaj qytetarëve të vet.
Fillimisht e pranuan Marrëveshjen e Prespës si kryevepër të diplomacisë.
Pastaj pranuan se me Marrëveshjen e Prespës janë të mbrojtura gjuha maqedonase, identiteti kombëtar maqedonas dhe kultura.
E pranuan edhe NATO-n si gjë të mirë për investimet dhe sigurinë.
Ndërsa tani erdhi edhe një konfirmim tjetër: Mickoski ka Qeveri plot me pasaporta bullgare dhe shtetësi bullgare.
Me vite përhapën histeri, frikë dhe i gënjyen qytetarët se identiteti maqedonas është i rrezikuar, pikërisht ata që kanë pasaporta bullgare në xhepa.
Zëvendëskryeministra, ministra, deputetë, kryetarë komunash, drejtorë, një rrjet i tërë funksionarësh të VMRO-GOK me pasaporta bullgare, të cilët me vite shisnin patriotizëm të rremë, ndërkohë që në heshtje siguronin dokumente evropiane për veten dhe për familjet e tyre.
Derisa e mbajnë Maqedoninë në izolim dhe qëllimisht krijojnë konflikte me Bullgarinë, shumë funksionarë të VMRO-OKG kanë siguruar pasaporta bullgare – pasaporta të Bashkimit Evropian.
Refuzimi i Ligjit e nxori në pah gjithë politikën e tyre hipokrite. Më nuk mund ta gënjejnë askënd.
Qytetarët po e shohin të vërtetën.
Më të zëshmit kundër Evropës janë pikërisht ata që prej kohësh e kanë siguruar Evropën për vete”.
