Sot moti do të jetë me vranësira të ndryshueshme dhe më i freskët. Kryesisht në pjesët perëndimore do të ketë reshje të herëpashershme lokale shiu. Si pasojë e depërtimit të një mase ajrore më të ftohtë nga veriu, në zonat malore do të ketë kushte që reshjet të jenë në formë dëbore, ndërsa në disa vende më të larta do të paraqiten reshje të përziera, shi dhe dëborë. Do të fryjë erë mesatare nga drejtimi lindor dhe juglindor. Temperatura minimale do të lëvizë nga 0 deri në 6 gradë, ndërsa ajo maksimale do të arrijë nga 8 deri në 14 gradë Celsius, informon PressOnline.al
Në Shkup, moti do të jetë me vranësira të ndryshueshme, ndërsa në disa pjesë të luginës do të ketë reshje të dobëta shiu. Do të fryjë erë e dobët deri mesatare nga drejtimi juglindor, veçanërisht gjatë paradites. Temperatura minimale do të zbresë në 4 gradë, ndërsa maksimalja do të arrijë deri në 12 gradë Celsius.
Në ditët në vijim, moti do të jetë me vranësira të ndryshueshme dhe më i freskët. Të enjten priten reshje të herëpashershme lokale shiu, të cilat do të jenë më të theksuara në pjesët perëndimore. Për shkak të zbritjes së një mase ajrore më të ftohtë nga veriu, në zonat malore dhe në disa vende më të larta do të ketë kushte që reshjet të kalojnë në dëborë. Do të fryjë erë mesatare, në disa vende herë pas here e përforcuar, nga drejtimi verilindor. Të premten dhe gjatë ditëve të fundjavës do të mbizotërojë mot stabil dhe i thatë.
