Shumë njerëz marrin suplemente të vitaminës D për të trajtuar mungesën e saj, por jo të gjithë e dinë se disa suplemente të tjera mund të ndikojnë në mënyrën se si kjo vitaminë përthithet dhe funksionon në trup.
Ekspertët thonë se kombinimi i gabuar i suplementeve mund të ulë efektin e vitaminës D ose të krijojë çekuilibra në organizëm. Ja cilat janë disa prej tyre që kërkojnë më shumë kujdes.
Magnezi
Magnezi është i rëndësishëm për aktivizimin e vitaminës D në organizëm. Megjithatë, kur merret në sasi shumë të mëdha, ai mund të prishë balancën e kalciumit në trup.
Nëse merrni suplemente me magnez, vitaminë D dhe kalcium, është mirë që magnezin dhe kalciumin t’i merrni në intervale të ndryshme gjatë ditës. Kjo ndihmon që organizmi t’i përthithë më mirë.
Ekspertët rekomandojnë gjithashtu që magnezin ta merrni sa më shumë nga ushqimi. Burime të mira janë perimet me gjethe jeshile, arrat dhe farat, drithërat e plota dhe bishtajoret.
Kalciumi
Kalciumi dhe vitamina D shpesh merren së bashku sepse ndihmojnë në forcimin e kockave. Megjithatë, nëse kalciumi merret në doza shumë të larta, ai mund të ndikojë në metabolizmin e vitaminës D dhe të disa lëndëve të tjera ushqyese.
Për këtë arsye, nëse ju duhet të merrni shumë kalcium, këshillohet që suplementet e kalciumit dhe vitaminës D t’i merrni në momente të ndryshme gjatë ditës.
Vitamina K
Disa studime sugjerojnë se një çekuilibër mes vitaminës D dhe vitaminës K, kur merren si suplemente, mund të bëjë që kalciumi të depozitohet në enët e gjakut dhe jo në kocka.
Me kalimin e kohës, kjo mund të rrisë rrezikun për probleme si Ateroskleroza, një gjendje që lidhet me ngurtësimin e arterieve dhe që mund të çojë në infarkt apo goditje në tru.
Megjithatë, kombinimi i duhur i vitaminës K2 me vitaminën D mund të jetë i dobishëm për shëndetin e kockave dhe të zemrës. Para se t’i merrni bashkë si suplemente, është mirë të konsultoheni me një mjek ose dietolog për dozën e duhur.
Vitamina A
Marrja e tepërt e vitaminës A në formë suplementi mund të ulë përfitimet që vitamina D ka për shëndetin e kockave. Kjo ndodh sepse të dyja janë vitamina që treten në yndyrë dhe përdorin mekanizma të ngjashëm për përthithje në organizëm.
Zgjidhja është balanca. Vitaminat A dhe D përthithen më mirë kur merren gjatë një vakti që përmban yndyrë.
Ekspertët rekomandojnë gjithashtu që vitamina A të merret kryesisht nga ushqimi, si karotat, patatet e ëmbla, spinaqi dhe lakra jeshile. Këto ushqime përmbajnë beta-karoten, i cili shndërrohet në vitaminë A vetëm kur trupi ka nevojë.
Nëse përdorni multivitamina që përmbajnë vitaminë A, preferoni produkte ku kjo vitaminë është në formën e beta-karotenit dhe jo në forma sintetike.
A është e sigurt vitamina D?
Në përgjithësi, vitamina D mund të merret pa problem edhe me shumë suplemente të tjera. Megjithatë, duhet treguar kujdes sidomos me magnezin, kalciumin, vitaminën K dhe vitaminën A.
Para se të shtoni një suplement të ri ose të ndryshoni mënyrën se si i merrni ato, është gjithmonë mirë të këshilloheni me një profesionist shëndeti. Ai mund t’ju ndihmojë të përcaktoni dozën e duhur dhe kohën më të përshtatshme për marrjen e tyre.
